________________
जयन्तीप्रकरणवृत्तिः । गाथा २।३
ओसारइ निम्मल्लं निज्झरसलिलेण न्हावए निच्चं । चंदणविलित्तगत्तं सुयंधकुसुमेहिं पूएइ ॥५६०॥ उक्खित्तधूवधूमुच्छलंतलहरीउ सुरहिगंधेण । सिरिकंपचलिरअलयस्सिरिं वहंति व्व आसाणं ॥५६१॥ गोमयरसच्छडाहिं रेहइ देवंगणं च बहलाहिं । घणपुप्फपयरसोहं कुसुमियनंदणवणसिरीयं ॥५६२॥ अह अन्नदिणे बडुओ आगच्छंतो सुणइ संलावं । केण समं को जंपइ इय अवहियमाणसो जाओ ॥५६३| तो तेण माहणेणं अवहिअचित्तेण पडिसुणंतेण । नायं सयं पुलिंदं संभासइ एस सिवदेवो ॥५६४॥ तो चिंतेइ स बडुओ एस विवेओ सिवस्स अइकडुओ । जं पाववल्लिकंदे एस पसन्नो इह पुलिंदे ॥५६५॥ असुई अदंतपवणो विणयविवेएहि वज्जिओ निच्चं । एसो मेच्छो तुच्छो अगोयरो सुरपसायस्स ॥५६६।। किं चुज्जं ? गुणवंता कलिकाले जमिह दुल्लहा होति ।
तं चित्तं देवाण वि गुणाणुराओ वि जं दुलहो ॥५६७।। अन्नं च
"अग्घंति कलीए खला जह तह सुयणा न चेव अग्घंति । ठाणे विक्काइ सुरा घराघरि गोरसं भमइ" ॥५६८॥ जं ईसरो वि अहवा अइसुरहिं केयई परिचज्ज । धत्तूरयपुप्फाई इच्छइ किं तत्थ वत्तव्वं ? ॥५६९।। आराहिज्जइ जो वा न तत्थ एवं वियप्पणा होइ । देवाणं चरियाई गंभीराइं अहव हुंति ॥५७०।। इच्चाइ चिंतिऊणं तम्मि पुलिंदम्मि अइगए संते । गंतूण माहणो सो सोवालंभं सिवं भणइ ॥५७१॥ किं देव ! एस नाओ ? जमिह पुलिंदम्मि तं सि सुपसाओ ।
महभत्तिविसेसाओ कि अहिया तस्स पूयाओ? ॥५७२॥ १. केशशोभाम् ।
15
20
25
Jain Education International 2010_02
For Private & Personal Use Only
www.jainelibrary.org
