Chandappahasami Chariyam

SR No.: 001587
Original Sutra Author: Jasadevsuri
Author: Rupendrakumar Pagariya, Jitendra B Shah
Publisher: L D Indology Ahmedabad
Publication Year: 1999
Total Pages: 246
Language: Prakrit
Classification: Book_Devnagari, Story, & Biography
File Size: 17 MB

Page 90

अजियसेनचक्कवट्टी मोत्तूणं जिणसासणं न य तिगस्सऽन्नत्थ मेलावओ । सामग्गी सयलत्थसाहणकरी सव्वत्थ जं दुल्लहा || मिच्छत्ताइ निवारणम्मि सययं एयम्मि वीरा तिगे । एत्तो चेव कसायसत्तुजइणो हुंतऽप्पम्मत्ता जई ॥ १५३३ ॥ तो संलत्तं रन्ना, जइ एवं ता पयच्छ पव्वज्जं । मज्झ वि जेण इमाणं, संजायइ सव्वपरिहारो || १५३४ ॥ मा पडिबंधं वियरसु, देवाणुपिय त्ति आह तित्थयरो । अणुजाणावइ चक्कि, अजियंजयनरवरो तयणु ॥ १५३५ तेण वि भणियं आगच्छ ताव गेहम्मि जाव जेण अहं । निक्खमणमहामहिम, तुज्झ करावेमि भत्तीए ॥ १५३६ ।। भणइ इमो वि हु सेयाई पुर किर हुंति विग्घबहुलाई । ता पत्थुयम्मि कज्जे, मा कालविलंबमायरसु ।। १५३७ ।। चक्कहरो वि हु जंपइ, कालविलंबो न को वि तुह होही । केवलमिणं ससोभं, जह होइ तहा करावेमि ॥ १५३८ इय भणिऊणं अभिवंदिऊण तित्थेसरं तिजगनाहं । अजियजयनरनाहो, नीओ गेहम्मि पुत्तेण ॥ १५३९ ॥ कारवइ तयणु अट्ठाहियाओ अइवित्थरेण जिणभवणे । दावेइ महादाणं, दिणाणि जा अट्ठ संतुट्ठो ॥ १५४० घोसावइ य तियचउक्कचच्चराईसु जस्स जेणेत्थ । कज्जं सो तं गिन्हउ, अजियंजयरायनिक्खमणे ॥ १५४१ ।। संघस्स य सम्माणं, कारविउं नरसहस्सवहणिज्जे । सिबियारयणे आरोविऊण अइगुरुविभूईए ॥ १५४२ ।। नीओ जिणस्स पासं, सिबियारयणाओ ओयरेऊण । तिपयाहिणं च दाउं, जिणस्स तो भणइ भत्तीए ।। १५४३ ।। जिणनाह विवहसारीरमाणसाणेयदुक्खगहिरम्मि । पडियं भवंधकूवम्मि दीणकरुणाई विलवंतं ॥ १५४४ ॥ मं उत्तारसु तं नियदिक्खा हत्थावलंबदाणेण । सहियं इमेहिं धम्मत्थिएहिं बहुनरवरिंदेहिं ॥ १५४५ ॥ इय भणिऊणं सयमेव पंचमुट्ठीहिं उक्खणिय केसे । पडिओ जिणस्स चरणेसु तेण अह दिक्खिओ विहिणा ॥ १५४६ ।। अन्ने वि नरवरिंदा, विहिणा तेणेव तत्थ निक्खंता । चरणम्मि निप्पकंपा, जाया सव्वे वि मेरु व्व ॥ १५४७ ।। एवं सो अजियंजओ नरवई तित्थकरस्संतिए । घेत्तुं दिक्खमसंखसोक्खजणयं सिक्खं च अब्भासिउं ॥ सुत्ताहिज्जणकप्पतेप्पविसयं जाओ तहा संजमी । धम्मे सज्जसदेवसोक्खजणगे अन्ने विलग्गा जहा ।। १५४८ ।। इइ चंदप्पहचरिए, जसदेवंके चउत्थपव्वम्मि । जं उक्खित्तं कहियम्मि तम्मि एयं परिसमत्तं ॥ १५४९ ।। एत्तो उ अजियसेणस्स चक्कवट्टिस्स पंचमे पव्वे । अच्चुयकप्पुप्पत्तिं, कहिज्जमाणी निसामेह ।। १५५० ।। (पंचमो पव्वो) तं नमह जस्स देहज्जुईए धवलोकयम्मि दिसिवलए । लक्खिज्जइ भुवणं खीरजलहिमज्झा इवुत्तिन्नं ॥ १५५१ ।। अजियंजयनरवईणा, जिणनाहसयंपहस्स पामूले । गहिए वयम्मि चक्की, नियगेहं जाइ गुरुसोओ ॥ १५५२ ॥ मंतीहिं तओ भणिओ, नरवर ! जाणंतओ वि कीस तुमं । वियरसि मणभवणम्मी, सोयपिसायस्स अवयासं ।। १५५३ धन्नो खलु तुज्झ पिया, जो सासयसोक्खमोक्खकयलक्खो । चइडं भवं पवन्नो, दिक्खं जिणणयमूलम्मि ॥ १५५४ एमाइवयणरयणाई पवरमंतीहिं हरियसोयभरो । लग्गो कमेण सयलाइरज्जकज्जाइं चिंतेउं ।। १५५५ ।। अवि य - सासंते जम्मि मही, जिणनयणचओरसीयकिरणम्मि । गिम्हदिणेसु वि न जणइ, जणस्स तावं रविकरोहो ॥ १५५६