Page Text
________________
अजियंजयनरवड
४१
इच्चाइ विणोएहि, दिणे गमंतस्स अन्नदियहम्मि । आउहसालाए दिव्वचक्करयणं समुप्पन्नं ॥ १०५० ।। (कुलयं) अवलोइऊण जं किरणजालनिम्महियतिमिरनिउरुंबं । मन्नइ लोओ सेवासमागयं तरणिबिंबं व ॥ १०५१ ।। वग्गंतसत्तुवग्गस्स खग्गमुग्गं भयं उवजिणितं । निययज्जुइउज्जोइयदिसविवरं तह य संजायं ॥ १०५२ ॥ नियकालिमाइ जियसयलजलयमवलोइऊण जं च जणो । भणइ कयंतो एयच्छलेण सेवेइ चक्कहरं ।। १०५३ ।। जायं च तस्स छत्तं, सुपवित्तं चंदकिरणसच्छायं । सेवागयाए लच्छीए संतियं वासपउमं व ॥ १०५४ ।। सिंधुजलतरणमाइसु, किरियासुवओगिचम्मरयणं पि । तं संजायं पुन्नेहिं तस्स जं जणइ जणचोज्जं ॥ १०५५ ।। जं च धराइ पसारियमणप्पमंडलमुदारजोइं च । चक्कहरमहिमनिज्जियनहं व संकुडियमिह पत्तं ॥ १०५६ ।। पुव्वभवोवज्जियपुन्नपुंजवुड्ढीए दंडरयणं पि । तं से जायं जं खलइ न खलु गुरुपव्वएसुं पि ।। १०५७ ॥ सहइ करजालरंजियनहविवरं जं च सुरवइकराओ । चक्किभयकंपमाणाउ निवडिओ वज्जदंडो व्व ॥ १०५८ ।। रविकरअगोयरस्स वि, गुहाइ तिमिरस्स नासणनिमित्तं । सेवं पवेसिया ससिकल व्व से कागिणी जाया ।। १०५९ जइ होज्ज विज्जुपुंजो, कथमवि सोमो थिरप्पयासो य । घणमेहतिमिरहरणं, तो तेणुवमिज्ज तस्स मणिरयणं ।। १०६० (गीतिका) जस्स छलेणं गरुयत्तनिज्जियो सुरगिरि व्व सेवमिओ । तं करिवररयणं तस्स जायमच्चब्भुयसरूवं ।। १०६१ ।। जस्स मिसेणं मुत्तो, व मारुओ सेवए सविहवत्ती । जियमणवेगं उत्तमहयरयणं तस्स तं मिलियं ॥ १०६२ ।। सोढुमसक्को गुरुवइरिवीरवारेण विक्कमो जस्स । नियतेयविजियभाणू, स तस्स सेणावई आसि || १०६३ ॥ देवासुरनरकुग्गहउवद्दवावहरणम्मि सुसमत्थो । सोहइ से पच्चक्खो, पुरोहिओ पुन्नरासि व्व ॥ १०६४ ।। तक्खण संचिंतियसुरविमाणघडणे वि जस्स सामत्थं । से अच्चब्भुयकम्मो, जाओ सो वड्ढई रयणं ।। १०६५ ।। जो लोयनीइनलिणीसरोवरं चित्तभित्तिलिहिए य । आयव्वए धरेई, सया वि न य मुज्झइ कहिं पि ॥ १०६६ ।। सो बुद्धिविहवनिज्जियबिहप्फई सइ विइन्ननियचित्तो। चक्किगिहविविहकज्जेसु संगओ गिहवई तस्स ।। १०६७ (जुयलं) इत्थीरयणं पुण पुव्वमेव भणियं ससिप्पहा तस्स । एवं इमाई चोद्दस वि चारुरयणाई सिद्धाइं ।। १०६८ ।। एक्केक्कयं च रयणं, जक्खसहस्सेण परिवुडं तस्स । दो य सहस्सा जक्खाण अंगरक्खोवउत्ता से || १०६९ ।। रयणाणि व नव निहीउ, सुकम्मसंभारपेसिया पयडा । सन्निहियदिव्वदेवा, उवट्ठिया सिरिहरे तस्स ।। १०७० ।। ते य इमे - नेसप्पे पंडुयए, पिंगलए सव्वरयणनामे य ! काले य महाकाले, माणवगे पउमसंखे य ॥ १०७१ ॥ नेसप्पाओ सयणासणोवहाणाइ देहसुहहेऊ । संपज्जइ से सव्वं, महिड्ढिरम्मुज्जलविसालं ॥ १०७२ ।। सालि-जव-वीहि-तिल-चणय-मुग्ग-मासायसी-तुयरिमाई । धन्नं से संजायइ, सयलं पि हु पंडुयनिहीओ ॥ १०७३ मणि-मउड-कडय-कुंडलकेउरसुतारहारमाईणि । वरभूसणाणि अइमणहराणि से पिंगलो देइ ।। १०७४ ।। रयणाण पंचवन्नाण किरणजालेण चित्तरूवेण । आबद्धइंदधणुहाण सव्वरयणाउ उप्पत्ती ।। १०७५ ।। रुक्ख-लय-गम्मग-गुच्छाइसंभवं चित्तहारिरसगंध । सव्वोउयफलफुल्लाइ देइ कालो निही तस्स ।। १०७६ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |