Page Text
________________
सिरिधम्मनिवो
सीहरहा वि समुट्ठिय जणणिं जणयाण पडइ पाएसु । आणंदबाहजलभरियलोयणा तेऽवगृहति ।। ४१२ ॥ पुत्तं पुत्तिं च तहा, भणंति तह सोयगग्गरगिराए । धन्नो सि तुमं पुत्तय ! जो गहिओ केरलनिवेण ॥ ४१३ ।। सुहलालणाहिं तइया, सिरिदेवीए य लालिओ तह य । पडिवज्जिऊण पुत्तो त्ति गाहिओ तह कलाओ य ॥ ४१४ पुत्ति ! तुमं पि सपुण्णोदएण सीहीए वयणपडिया वि । संपत्ता न विणासं, तीए च्चिय पाविया वुड्ढि ।। ४१५ स च्चिय माया जाया, सुरेहिं तं रक्खिया सभवणे व्व । भीमारण्णे वि ठिया, सुहेण पत्ता य तारुण्णं ॥ ४१६ एमाइ सुणंतीए, तीए आवरणखयउवसमेणं । जायं जाईसरणं, तेणं नाओ य पुव्वभवो ॥ ४१७ ।। करतलकयंजलिउडा, तो भणइ मुणीसरं जहा नाह ! । जह भणियं तुब्भेहि, तहेव तं सव्वमविगप्पं ।। ४१८ ॥ अहवा केवलदिट्ठी, न चलइ कइया वि जइ वि हु चलेज्ज । नियठाणाओ मेरू, जलही व चएज्ज मज्जायं ।। ४१९ एत्तो च्चिय केवलनाणिदिट्ठभावेसु के वि जे मूढा । संदेह विवज्जासे, करंति ते वंचिया वरया ॥ ४२० ।। एत्थंतरम्मि केरलरायं आपुच्छिऊण कुमरो वि । मन्नाविऊण देवे, आभासिय सिंहमाई य ॥ ४२१ ॥ जणणि जणय भइणि भणइ समुठेह वंदह मुणिदं । मुंचह वणवासमिम, आगच्छह सिरिकरपुरम्मि ॥ ४२२ ।। (जुयल) तव्वयणेण तओ ते, समुट्ठिऊणं महामुणिं नमिउं । सिरिकेरलनाएणं, सह सिरिकरपुरमणुप्पत्तो ॥ ४२३ ।। वणरायकुमारेणं, तत्थ पवेसो महाविभूईए । कारविओ जणयाईण गरुयवद्धावणं तह य ॥ ४२४ ॥ केरलनरिंदमापुच्छिऊण अन्नम्मि सुहदिणे तत्तो । तस्स बलेण समेओ, विसालनयरीए संचरिओ ।। ४२५ ॥ अणवरयपयाणेहिं, संपत्तो तत्थ अरिबलेण समं । जाओ य दारुणरणो, सत्तुबलं बहु उवद्दविउं || ४२६ ।। नीसारिऊण य तओ, नयरीओ रिउबलं समग्गं पि । संठाविऊण पियरं, रज्जे चयमाणिउं तं च ।। ४२७ ।। सव्वजगसूरसिरिसूरराइणो नियसहोयरिं देइ । तेण य विच्छड्डेणं, पहाणलग्गम्मि परिणीया ॥ ४२८ ॥ केरलनिवस्स आणं, अणुवत्तितो सयं पुण कुमारो । सामंताइसमेओ, समागओ सिरिकरपुरम्मि || ४२९ ॥ तत्थ य धरणीनामं, नियसामंतस्स संतियं कण्णं । केरलरन्ना परणाविओ य दिन्नं च नियरज्जं ॥ ४३० ।। विजियंतरारिसेण्णो, रायमवि य तहाविहाण सूरीण | पासम्मि लेइ दिक्खं, तो सिक्खइ दुविहसिक्खं च ॥ ४३१ वणरायस्स वि जाओ, रज्जं नीईए पालयंतस्स । हरिणामा वरपुत्तो, धरणी देवीए सुहजुत्तो ॥ ४३२ ॥ नियजणणि-जणयभत्तो, गुणाणुरत्तो उदत्तवरसत्तो । निम्मलकलापसत्तो, कमेण अह जोव्वणं पत्तो ॥ ४३३ ।। इओ य - सीहरहाइ वि सह सूरराइणा निययकंतकंतेण । सोक्खं अणुहवमाणीए अट्ठ जाया कमेण सुया ॥ ४३४ ।। अट्ठण्ह सुयाणुवरिं, जाया पुत्ती य मइसिरी नाम । हरिणो साइ विइन्ना, नियभाइसुयस्स रइरूवा ॥ ४३५ ।। वीवाहिया य तेणं, महाविभूईए सोहणे दिवसे । अन्नम्मि दिणे वणरायदेवरन्ना वि नियरज्जं ॥ ४३६ ॥ संकामिऊण पुत्ते, हरिम्मि नियभइणिभइणिनाहेहिं । सह सुव्वयगुरुपासे, पव्वज्जा रायपडिवन्ना ।। ४३७ ।। जो सो वणरायनिवो, सो अहयं संपयं वयपवन्नो । दोण्ह भवाण सरूवं, दिळं जेणेगजम्मे वि ॥ ४३८ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |