Page Text
________________
१८५
चंदप्पहजिणवण्णणं आयासम्मि ढलंत उभओ पासेसु सहइ सामिस्स । सियचमरजुयं भत्तीए नमिर हं सउलमिव अलियं ॥ ५७४९ ।। सीहासणम्मि पणवन्नरुइररयणोहकिरणचिंचइयं । जं चलइ गयणमग्गेण संगयं पायपीढेण ।। ५७५० ॥ विहरते तिहुयणबंधवम्मि नासियअसेसदुरियम्मि । तं मन्ने तस्सेव य अउव्वमाहप्पकहणत्थं ।। ५७५१ ।। (जुयल) जिणमुहगुणोहविजियाइं पायसेवाए आगयाइं च । सुरविरइयकमलाई नवनवाई विरायंति ॥ ५७५२ ।। एक्केण मुहेण कहं अणेगविहरूवउवगइसरूवं । वन्निस्समहं इय चिंतिउं व चउमुहयमेइ जिणो ।। ५७५३ ।। जं नहरोममवट्ठियमुवरइयं जिणवरस्स देवेहिं । तं साहाविय जिणरूवदंसणत्थं व सयकालं ।। ५७५४ ।। हेट्ठा हुत्ता जायंति कंटया जमिह जिणवरिंदम्मि । परिहयअसेससिग्घम्मि विहरमाणम्मि नरलोए ।। ५७५५ ॥ तं अन्नाण वि परमम्मभेयकारीण तित्थयरवयणेण । होही अहोमुहं चिय सरणं इय साहयंति व्व ।। ५७५६ ।। (जुयलं) विडवसहिओ न एसो जडजुत्तो नेय न य असन्नाणो। तह वि हु वंछियफलओ अम्हे न तह त्ति कलिउं व ॥ ५७५७ पणमंति जिणवरिंदस्स तरुगणा वि हु फलाइ रिद्धिजुया । संपत्तपत्तसंगो को वा न गुणुत्तमे नमइ ॥ ५७५८ ॥ (जुयलं) पंचेव इंदियत्था मणोरमा जं च जिणवरिंदस्स । संजाया सव्वत्थ वि सुरभत्तिविणिम्मियसरूवा ।। ५७५९ ॥ तप्परिहयदप्पे पासिऊण इंदियभडे अइपयंडे । तव्विसया जिणचित्ताणलोमणत्थं व अणपत्ता ।। ५७६०।। (जयल पयडियनियनियअणुभाववित्थरा जं च सुरपभावेण । अवयरिया समकालं उउणो सयला वि नरलोए ॥ ५७६१ ॥ मन्ने ते वि जिणिंदस्स सुमणसंपत्तिमणुवमं दटुं। सेवं कुणंति तइया नियनियलच्छी अलंकरिया ॥ ५७६२ ।। (जुयलं) वाउकुमारायत्तो अहयं ते वि हु जिणम्मि अइभत्ता । तो कह पडिकूलो होमि तम्मि इय चिंतिऊणं च ॥ ५७६३ ।। अणुकूलो वहइ सया तइया पवणो वि जिणवरिंदस्स । अच्चब्भुयचरियाणं जयम्मि को वा न अणुकूलो ।। ५७६४ ।। (जुयल) मंगलनिहिणो कइय वि अमंगलं होउ मा जिणिंदस्स । इय चिंतिउं व सउणा पयाहिणा चेव जंति सया ।। ५७६५ ।। गंधोदयवुट्ठीए वुट्ठीए पंचवन्नकुसुमाण । विहरंतम्मि जिणिंदे अलंकिया जं सुरेहिं मही ॥ ५७६६ ।। तं मन्ने उत्तमसंगेमण इयरा वि निरुवमसिरीए । जायंति भायणं पयडणत्थमेवं वि हत्थस्स ।। ५७६७ ।। (जुयलं) भवणाहिववंतरजोइसाण वेमाणियाण य जिणस्स । कोडीजहन्नओ वि हु पाविज्जइ समवसरणम्मि ॥ ५७६८ ।। तित्थयरनामकम्माणुभावओ जं जिणस्स पामूलं । सुन्नं न होइ कइय वि सुरेहिं इंतेहिं जंतेहिं ।। ५७६९ ।। पायारतियमसोओ य दुंदुही पुव्ववन्निया चेव । इय चउत्तीसाइसएहिं संजुओ विहरइ भयवं ।। ५७७० ॥ केवलिमहिमं काउं एत्तो उ जिणस्स सुरवरिंदा वि । नियनियपरिवारजुया दीवे नंदीसरम्मि गया ।। ५७७१ ।। सव्वेसु वि जिणकल्लाणएसु जत्तो कुणंति देवगणा । अट्ठाहियाओ तहियं सासयपरिमाणभत्तीए ॥ ५७७२ ।। नंदीसरो य दीवो अट्ठमओ सो असंखदीवेसु । जंबुद्दीवाईएसु जलहिछिन्नेसु पत्तेयं ।। ५७७३ ।। दुगुणा दुगुणपमाणा दीवसमुद्दा हवंति सव्वे वि । तेसु य पढमो जोयणलक्खं तत्तो दुगुणवुड्ढी ।। ५७७४ ।। एवं जोयणलक्खा बत्तीससहस्ससत्तयसयाइं । अडसट्ठि जुयाइं उभयओ वि नंदीसरे दीवे ।। ५७७५ ।। सुरविज्जाहरकीलानिवासरमणीयविविहठाणम्मि । बहुमंदिरुक्खवणसंडमंडिए सिरिनिहाणम्मि ।। ५७७६ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |