Page Text
________________
१८२
सिरिचंदप्पहजिणचरियं एत्तो च्चिय ते सम्मत्तमंतिसंजोइएहिं भावेहिं । एगंतेण सुहोदयरूवेहिं जहिं सया सुहिणो ।। ५६६८ ॥ केवलमेएसिं पि हु चिरकालाओ वि ठिइखओ होइ । तेण य खिप्पंति इमे वि माणुसी गब्भवासम्मि ।। ५६६९ ॥ तत्थ य असायसुहडो पुव्वमलद्धावयासमरिसेण । लद्धंतरो वियंभिउमाढत्तो किं पि अच्चन्तं ।। ५६७० ।। एत्थंतरम्मि सम्मत्तमंतिसु पउत्तसुद्धभावेहिं । तेसिमसायप्पसरो पायं पडिहम्मइ पभूओ ।। ५६७१ ।। विजयाईएहितो जओ चुया हुति के वि तित्थयरा । के वि पुण चक्कवट्टी अच्चंतमुइन्न पुन्नभरा ॥ ५६७२ ।। जे वि हु सामन्ननरा तओ चुया के वि हुंति ते वि दढं । अच्चग्गलसुहकलिया पायं एक्कावयाराई ॥ ५६७३ ॥ सव्वट्ठसिद्धिनामाओ जे पुणो इंति वरविमाणाओ। एगावयारभावे तेसिमिह निच्छओ चेव ॥ ५६७४ ।। सोक्खं चिय तेसिमओ दुहं तु सक्कररसालुदुद्धजुए । थालम्मि सूइमुहखित्तनिंबरसबिंदुसायसमं ॥ ५६७५ ।। कडयम्मि मोहरायस्स किं च जे संति के वि वरसुहडा । थेवो च्चिय अवयासो तेसि पि अणुत्तरसुरेसु ॥ ५६७६ ॥ जे उण सुबोहनरवइवसंगयाचरणधम्मरायस्स । आणाए वट्टित्ता संपत्ता सिवगइपुरीए ।। ५६७७ ।। तेसिं न दुक्खलेसो वि होइ कइया वि कह वि कत्तो वि । न य तत्तो वि णियत्ती वि ताण केणावि कीरइ य ।। ५६७८ जम्हा य कम्मपरिणामरायसेन्नस्स तत्थ अवयासो । थेवो वि अत्थि दड्ढे बीए इव अंकुरुप्पाओ ॥ ५६७९ ।। चउसु वि गइनयरीसुं एवं च सुहं न अत्थि संसारे । मोत्तूण सिवगइपुरिं जीवाणं सोक्खकामाणं ॥ ५६८० ॥ भो भो भव्वा ! ता जइ इच्छह तुब्भे वि सोक्खमणवरयं । सम्मत्तमहामंती ता जं कारवइ तं कुणह ।। ५६८१ ।। सो च्चिय सुबोहरायस्स कुणइ वसवत्तिणं जओ जीवं । चारित्तधम्मरायस्स तह य अप्पेइ सो चेव ।। ५६८२ ।। चारित्तधम्मराओ वि तं ससेन्नस्स नायगं काउं । कम्मपरिणामनरवइकडयं गंजावई तत्तो ।। ५६८३ ॥ देइ य निम्मलकेवलजयप्पडायं इमस्स सो तुट्ठो। सिवनयरिं च पवेसइ तम्मि समग्गे वि निहयम्मि ।। ५६८४ ॥ एगंतसोक्खट्ठाणं एवं सो होइ तत्थ संपत्तो । सारीरमाणसेहिं विवज्जिओ सयलदुक्खेहिं ।। ५६८५ ॥ एवं जे केइ सत्ता मह वयणमिणं भावओ भाविऊणं । उच्छिदिस्संति गाढामरिसवसगया कम्मरायस्स सेन्नं । सम्मत्तामच्चसेवा उवचिणिय सुबोहाइ रायप्पसाया। होहिति ते हु एत्थं अमलिणजसदेविंदपुज्जा जयम्मि ।। ५६८६ ॥ इइ चंदप्पहचरिए जसदेवंकम्मि नवम पव्वम्मि । उद्दिट्ठवत्थुभणियं दसमं पभणामि एत्ताहे ।। ५६८७ ।।
नवमं पव्वं सम्मत्तं (दसमो पव्वो) संगसमूसुयचित्ताइ मुत्तिलच्छीए पेसिया जस्स । दूइ व्व केवलसिरी तीए सरूवं पयासेइ ।। ५६८८ ॥ तं देहपहापसरंतवारिधाराहिं ताव हरणीहिं । पक्खालियपावमलं जणस्स चंदप्पहं वंदे ॥ ५६८९ ।। इय वयणं जयपहुणो पाउं सवणंजलीहिं अमयं व । पावविसवेयमुक्का जाया सयला वि सा परिसा ॥ ५६९० ॥ अह तम्मि खणे संसारसायरं भाविऊण दुहकुहरं । नित्थरिउमणा नावं व केइ गिण्हंति जिणदिक्खं ।। ५६९१ ।। अवरे जिणप्पउत्तम्मि रज्जुदंडे व्व पारसगुणम्मि । भवअंधकूवपडिया सावगधम्मम्मि लग्गति ।। ५६९२ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |