Page Text
________________
चंदप्पहजिणसासणवण्णणं
१५५ एसो य जमो तुह चेव सेवगो ता इमाओ मं रक्ख । आणाए तुम्ह जम्हा न पहरिही एस मह देव ! ॥ ४०४७ ।। जइ वि हु न पत्तकालं, परिहरइ जमो जणं जए किं पि । पत्थिज्जसि तह वि तुमं जेण असज्झं न ते किं पि ।। ४०४८ ।। विन्नायवत्थुरूवो जयप्पभू एवमाइ वयणाई । सुणिऊण तस्स पफुल्लवयणकमलो पयंपेइ ।। ४०४९ ।। किं वुड्ढपुरिस ! अम्हारिसाण कारुन्नकारणिं एवं । उल्लवसि गिरं अइदीणभावमेवं वहतोवं ।। ४०५० ।। जम्हा सप्पुरिसाणं वाणी एवंविहा तवेइ मणं । जइ वि किर कप्पियत्था भन्नइ तुमए महाभाय ! ॥ ४०५१ ।। सो को वि जओ न जयम्मि अत्थि होही हुओ व जो मच्चु । रक्खइ रक्खिस्सइ वा रक्खियवं वा समत्थो वि ।। ४०५२ ।। देवो वा दाणवो वा नरो व विज्जाहरो व अन्नो वा । अप्पणओ य परस्स व मच्चं टालेउमसमत्थो ।। ४०५३ ।। आउक्खओ उ मच्चू जंतूण जमो न एत्थ अन्नोत्थि । जीवेज्ज व मारेज्ज व जो एस भमो इमो सयलो ।। ४०५४ ।। दक्खिणदिसाए सामी जमो वि देवो जओ नियाउस्स । संपत्तम्मि खयम्मी मारिज्जइ किंतु अन्नेण ।। ४०५५ ।। पुन्ने व अपुन्ने वा नियाउए ता मरंति कम्मवसा । अत्तकयं कम्मं चिय जं मारइ जीवए वा वि ।। ४०५६ ।। भयवंतवयणमेवं निसुणतो चिय कहिं पि सो वुड्ढो । तत्तो गओ न नाओ लोएण सकोउगेणावि ॥ ४०५७ ।। तो पुच्छिउं पवत्तो सव्वो वि जणो क एस जगनाह !! खणदिट्ठनट्ठभवविलसियं व पयडीकयं जेण ॥ ४०५८ ।। तो भणइ भुवणबंधू आभोएऊण ओहिणा सयलं । तव्वइयरं हसंतो ईसीसि अहो जणे सुणह ॥ ४०५९ ॥ जो एस जन्निमित्तं समागओ जत्थ वा गओ खिप्पं । तुम्हं चिय पच्चक्खं करुणगिरं भासिऊणेवं ॥ ४०६० ॥ धम्मरुई नामेणं एस सुरो मज्झ पुव्वसंगइओ । एत्तो हु पंचमभवे जओ हमास सिरिअजियजयपुत्तो तइया अहं कुमारभावम्मि । वट्टतो अवहरिओ अत्थाणसहाइ मज्झाओ ।। ४०६२ ।। चंडरुईनामेणं असुरेणं किं पि अणुसरंतेण । पुव्विल्लवइरभावं, तब्भवओ तइय भवहेउं ।। ४०६३ ।। खित्तो य महारन्ने भीमम्मि तओ भमंतओ अहयं । एगागी संपत्तो रमणिज्जमहागिरि एक्कं ।। ४०६४ ।। मह सत्तपरिक्खकए हिरण्णदेवो तहिं च मं दहुँ । विगरालरूवधारी आढत्तो भेसिउं बाढं ॥ ४०६५ ।। न य भीओ हं तुट्ठो तओ य कहिऊण वइयरं निययं । इयरस्सवहारे कारणं च मित्तत्तमुवगम्म ।। ४०६६ ।। जाओ अदंसणपहं नीओ य अहं च वसिम देसम्मि । सुमिणं व मन्नमाणो अचिंतदेवाणुभावेण ।। ४०६७ ॥ संसारे भवगहणाई कइ वि हिंडित्तु संपयं जाओ। सोहम्मदेवलोए धम्मरुई एस तियसवरो ॥ ४०६८ ॥ इंदेण कीरमाणं सुणित्तु एसो य मज्झ गुणगहणं । पुव्वभवप्पडिबंधाउ आगओ झ त्ति पासम्मि || ४०६९ ।। पुव्विल्लभवे नियए आभोएऊण ओहिणा य तओ। चिंतइ य अजियसेणस्स एस जीवो न अन्नो त्ति ।। ४०७० ॥ तस्सेवत्थस्स विणिच्छयत्थमेसो महाविदेहम्मि । गंतूण पणमिऊण य पुच्छइ सिरिउदयजिणवसभं ।। ४०७१ ।। सो अजियसेणजीवो भयवं किं होइ भरहवासम्मि । चंदाणणापुरीए अप्पडिहयसासणो राया ॥ ४०७२ ॥ चंदप्पहनामेणं सच्चविओ जो समं सुरिंदेणं । अम्हेहिं तओ पभणइ तित्थयरो मेवमिइ वयणं ॥ ४०७३ ।। कहइ य पुव्विल्लभवे तस्स पुरो जिणवरो पुणो पुट्ठो । जो व अहं इह जाओ चविऊणं वेजयंताओ ॥ ४०७४ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |