Page Text
________________
१४८
सिरिचंदप्पहजिणचरियं
जय कोहजलणजलहरमायातरुगहणभंजणगइंद ! । लोहसरसोससूरिय ! रयणियरपहंजणाभोय ! ।। ३८५९ ।। जय माणसेलदारण ! वेज्जमहावायपावियसुसोह ! । सारीरमाणसासुहसरोयसंकोयसीयकर ! ॥ ३८६० ।। जय जय पसन्नलोयण ! देविंदविलासिणीविहियसेव ! । जय देवदेवपूइय, पूयारुहपयसरोयजुय ! ॥ ३८६१ ।। जय सयलभावभावुग, भाविमहाभोयकेवलालोय ! । भवणवइवाणमंतर, जोइसवासीस नमियकम ! ।। ३८६२ ।। जयकमलदलविलोयण ! पडिपुन्नमियंकसरिसमुहसोह ! । जय भवभावुत्तावियभवियजणाकालनीरहर ! ॥ ३८६३ ॥ जय मुत्तिमग्गमग्गय ! वरमुणिविरइयथुईहिं थुयचलण! । जय रोगसोगविरहिय ! विरहिजणाणं कयाणंद ! ।। ३८६४ ।। जय भवियकप्पपायवसूरयवरकुमुयकोसियसयाणं । नियकुलनहयलससहर, जय जयहि जिणिंद देववर ! ॥ ३८६५ ॥ थुणिऊण जिणं एवं हरिसवसुच्छलियबहलरोमंचो। अभिवंदिऊण पुणरवि, एगंतो ठाइ देविंदो ॥ ३८६६ ॥ निव्वत्तिएऽभिसेए अच्चुयदेवाहिवेण निस्सेसे । एवामेव सुरिंदा, सेसा वि कुणंति मज्जणयं ॥ ३८६७ ।। पाणयकप्पाहिवई, वीसइ सामाणिया सहस्सेहिं । तीसाइ सहस्सारो, चत्तालीसाए सुक्किदो ॥ ३८६८ ॥ पन्नास लंतगिंदो सट्ठीए बंभलोगसामी वि । माहिंदो सयरीए, सणंकुमारो वि सयरीए । ३८६९ ।। ईसाणसुरवरिंदो, असीइ सामाणिया सहस्सेहिं । एएसि चउगुणेहिं, सुरेहिं तह आयरक्खेहि ॥ ३८७० ।। तह नीयलोगपालयतावत्तीसगसुराइएहिं पि । पुव्वभणियसंखेहिं परिव्वुडा निययसत्तीए ।। ३८७१ ॥ वीसं पि भवणनाहा, चंदाइच्चा य वंतरसुरा य । नियपरिवारसमेया, कुणंति न्हवणं जिणिंदस्स ॥ ३८७२ ।। अह चंदणकलसाणं, पत्तीणं सासयाण थालाणं । रयणकरंडगसुपइट्ठपुप्फचंगेरिपडलाणं ।। ३८७३ ।। भद्दासणाण तह चामराण छन्ताण टालियंटाण । धूवकडच्छुयसरिसवतेल्लसमुग्गाइयाणं पि ।। ३८७४ ।। पत्तेयं पत्तेयं, अट्ठसहस्सं विणिम्मियं जं तं । तं पि जहोइयविहिणा, जहोइयं ते निउंजंति ।। ३८७५ ।। तयणंतरमीसाणो, अप्पाणं पंचहा विउव्वेइ । सक्को वि जिणं घेत्तुं, सक्कट्ठाणम्मि उवविसइ ।। ३८७६ ।। सक्को वि धवलवसहे चउरो लंबंतकिंकिणीदामे । उन्नयकउयसुसोहे, लंबोयरसंगए सुयणू ।। ३८७७ ॥ गुरुचारुचमरपुच्छे, उन्नयखंधे सिलिट्ठखुरचरणे । चउसु वि दिसासु दिव्वे, दिसागइंदे व्व निम्मवइ ॥ ३८७८ ॥ तेसिं सिंगेहितो, उड्ढं गंतूण खीरधाराओ । एगीभवंति तत्तो सिरम्मि निवडंति नाहस्स ॥ ३८७९ ॥ एवं सव्वजलेहिं, सव्वोसहिमाइएहिं दिव्वेहिं । नियपरिवारसमेओ, करेइ महिमं जिणिंदस्स ॥ ३८८० ।। ण्हवियम्मि जिणवरिंदे, मिउणा वत्थेण लूहियसरीरे । गोसीसचंदणेण, विलित्तगत्तम्मि सव्वत्तो ॥ ३८८१ ॥ विरएइ पवरपूयं, धूयं दाऊण मघमघायंतं । रयणमयतंदुलेहि, काऊणं अट्ठमंगलए ॥ ३८८२ ।। तत्तो दसद्धवन्नाण भमिरभमरावलीण कुसुमाण । जाणुस्सेहपमाणं, वुटिंठ पयरेइ सव्वत्थ ।। ३८८३ ।। पंचगं पणिवायं, काउं सक्कत्थएण थुणिऊणं । अछुत्तरसइएणं, थुणइ थुएणं तओ पच्छा ।। ३८८४ ।। संपाइयम्मि किच्चे, सव्वसुरिंदेहिं जिणवरिंदस्स । सहइ सरीरं नावइ, उदयट्ठियपुन्निमायंदो ।। ३८८५ ॥ तो तं मणहररूवं विरायमाणं विभूसणवरेहिं । पेच्छंता वि न तित्तिं, वयंति कुमुयाइं जह चंदं ॥ ३८८६ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |