Page Text
________________
चंदप्पहजिणजम्मवण्णणं
१४१
अहलोए वत्थव्वाण पढममह ताओ ओहिणा नाउं । अट्ठमजिणमुप्पन्नं दिव्वविमाणेण पत्ताओ ।। ३६६३ ।। भोगंकरा भोगवई, सुभोगा भोगमालिणी । सुवच्छा वच्छमित्ता य, पुप्फमाला अणिंदिया ।। ३६६४ ।। एयाओ वेगेणं आगंतूणं जिणिंदजणणीए । पासम्मि जिणं जिणमायरं च वंदित्तु भत्तीए ॥ ३६६५ ।। एवं भणंति हट्ठाओ देवि ! तुब्भं नमो महाभाए ! । तिजगुत्तमतिजगपईवदाइए ! तिजगसोक्खकरे ! ।। ३६६६ ।। अम्हे देवाणुपिए ! अट्ठ अहोलोयदिसकुमारीओ । जम्मणमहिमं काउं तुह वरपुत्तस्स पत्ताओ ।। ३६६७ ॥ न हु तम्हा तसियव्वं तुमए इय पणमिऊण तट्ठाणे । खंभसएहिं निविठं जम्मणभवणं विउव्विति ।। ३६६८ ॥ तो संवट्टगपवणं, विउव्विउं तेण कट्ठतणमाई । आजोयणं समंता जम्मणभवणाओ फेडंति ॥ ३६६९ ।। तयणंतरं जिणस्स य जिणजणणीए य भत्तिविणयणया । चिठेति गायमाणीओ नाइदूरे निविट्ठाओ ।। ३६७० ॥ एएणेव कमेणं अद्वैव उवेंति उड्ढलोयाओ। जायासणकंपाओ नाऊण जिणं समुववन्नं ॥ ३६७१ ।। मेहंकरा मेहवई सुमेहा मेहमालिणी । तोयधारा विचित्ता य वारिसेणा बलाहया ।। ३६७२ ।। आगंतूण इमाओ वि विहिणा तेणेव तो विउव्वन्ति । आजोयणं भगवओ जम्मणभवणस्स वद्दलयं ।। ३६७३ ।। तो गंधोदयवासं वासंति तहा जहा न बहुयजलं । न य चिक्खल्लं रयरेणुनासणं केवलं सुरभिं ॥ ३६७४ ॥ तह पुप्फवद्दलं पि हु विउव्वियं जलयथलयकुसुमाण । बिंटट्ठाईणं सुरहिगंधसंलग्गभमराण ।। ३६७५ ।। जाणुस्सेहपमाणं कुणंति वुट्ठि दसद्धवन्नाण । चिट्ठति गायमाणीओ तयणु जिणजणणिपासम्मि ॥ ३६७६ ।। (जुयल) एवं पुरत्थिमाओ, रुयगाओ दाहिणाओ अवराओ। अट्ठट्ठ उत्तराओ वि, आगम्म दिसाकुमारीओ ॥ ३६७७ ॥ नंदुत्तरा य नंदा आणंदा नंदवद्धणा चेव । विजया य वेजयंती जयंति अवराजिया चेव ॥ ३६७८ ।। आयंसगहत्थाओ, एयाओ दंसिऊण आयरिसं । पुव्वदिसाइ ठियाओ चिटुंती गायमाणीओ ॥ ३६७९ ।। समाहारा सुप्पदिन्ना सुप्पबुद्धा जसोहरा । लच्छिमई भोगवई चित्तगुत्ता वसुंधरा ।। ३६८० ।। भिंगाररयणहत्था एयाओ जिणस्स जणणिसहियस्स । दाहिणदिसट्ठियाओ चिटुंती गायमाणीओ ॥ ३६८१ ॥ एलादेवी सुरादेवी पुहवी पउमावई । एगाणसा णवमिया सीया भद्दा य अट्ठमा ॥ ३६८२ ।। एयाओ वि तित्थयरस्स जणणिसहियस्स पच्छिमदिसाए । वरटालियंटहत्था चिटुंती गायमाणीओ ॥ ३६८३ ।। अलंबुसा मिस्सकेसी वारूणी पुंडरीगिणी । आसा सव्वप्पभा चेव उत्तराओ सिरी हिरी ॥ ३६८४ ।। आगंतूण इमाओ वि, तहेव नाहस्स जणणिसहियस्स । चामरहत्था गायंतियाओ चिट्ठति उत्तरओ ।। ३६८५ ।। विदिसासु रुयगवत्थव्वगाओ पच्छा उवेंति तह चेव । चत्तारि विज्जुकुमारीण, सामिणीओ विवेगेण ।। ३६८६ ।। चित्ता य चित्तकणगा, सतेय सोमणि त्ति नामाओ । दीवियहत्था चउसु वि विदिसासु ठियाओ गायंति ॥ ३६८७ ।। तो मज्झ रुयगवत्थव्वयाओ चत्तारिदिसकुमारीओ । सव्वुत्तविंती इमेहिं नामेहिं सुपसिद्धा । ३६८८ ॥ रूया रूयंसा तह सुरूय रुइया वइ त्ति तह चेव । आगंतूणं पणमंति जिणवरं तस्स जणणिं च ।। ३६८९ ।। पभणंति य विणएणं अम्हे जिणजम्मकज्जकरणत्थं । पत्ताओ एत्थ मज्झिमरुयगाओ दिसाकुमारीओ ॥ ३६९० ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |