Page Text
________________
पउमनाहनिवो
११९
अवि य - मज्जंतमत्तवणकरिकरयडडोयलियमयजलालीढं । मयणाहिमंडणं पिव, विहाइ परिवेसि जीए भमरउलं। ३०८१ ।। (गीतिका) नाणाविहविहगेहिं उभओ पासट्ठिएहिं जा सहइ । निययविणोयकरहिं व, बहुविहकीलाइरमिरेहिं ॥ ३०८२ ।। गुरुमच्छमयरसुंकार दूरउच्छलियसलिलबिंदूहिं । जा य विरायइ तारयकुलाउला गयणवीहि व्व ॥ ३०८३ ।। जीए तडतरुवरंतरियतरणिकिरणासु पुलीणभूमीसु । सुरयसमसेयहारी, खेयरमिहुणाई रमइ सुहपवणो॥ ३०८४ (गीतिका) दिव्वंगरायघणपरिमलेहिं उवरंजियंबुपसरेहिं । नहदिट्ठाण वि जा खेयरीण पयडेइ जलकीलं ॥ ३०८५ ।। किंच - मत्तमयंगयजलहयवयणुव्वमियफेणपडलेहिं । जा पोसिज्जइ णं वाहिणीए समनामनेहेण ॥ ३०८६ ॥ से रम्मपरिसरेसुं, दिणाइं दो तिन्नि वीसमेइ निवो । हयगयरहपत्तिपहाणवाहिणीं वाहिणिनईए || ३०८७ ।। (कुलय) परिसक्किरकक्कडमीणमयररासिं समीरपयविं व । तं लंघिय अन्नदिणे, मणिकूडगिरिं समणुपत्तो ।। ३०८८ ।। उन्नयवंसो सिरिवच्छभूसिओ तुंगिमाइ लद्धजसो । गंभीरगुहाहियओ, उत्तिमपुरिसो व्व जो सहइ ।। ३०८९ ।। उल्लसिरकडयसोहो, जणमणहररम्मसीससंठाणो । दीसंतरुइरपाओ, रायकुमारो व्व जो य फुडं ॥ ३०९० ॥ अन्नोन्नघट्टणागयणपडियविज्जुज्जलब्भवंदं व । तं दतॄण नरिंदो, कसिणं मणिकिरणदित्तं च ॥ ३०९१ ।। चिंतइ निसासु सीसे, इमस्स चूडामणि व्व सहइ ससी । रयणुक्कडनियकडएहिं चेव कय असमसोहस्स ॥ ३०९२ ।। उव्वयरमेहलाणं, इमस्स कुण उज्जलाण ताराओ। अंतेसु फुरतीओ, कुणंति मणिकिंकिणीकिच्चं ॥ ३०९३ ।। पडवासकए अमरीहिं दड्ढकसिणगुरुधूमजलएहिं । वित्थारिज्जइ पाउससिरि व्व सीसे इमस्स सया ॥ ३०९४ ।। किन्नरगेयक्खित्तं, हरिणउलं निच्चलं निएऊण । गयणवरा सिप्पकुरंगविब्भमं एत्थ य कुणंति ॥ ३०९५ ॥ वारिता वि हु रवियरपवेसमोच्छइयगुहमुहा जलया। विज्जुज्जोयपयासियपिया पिया एत्थ खयराण ।। ३०९६ ।। निज्झरभरिज्जमाणाओ सिहरवावीओ एत्थ खयरीण । छिंदंति न जलकेलिं, अहो वि जलयम्मि वरिसंते ॥ ३०९७ ॥ एत्थ य मयंकसंगमझरंतससिकंतअमयपाणेहिं । जंति जरं न हु तरुणो निच्चुग्गयनवनवपवाला ॥ ३०९८ ।। रविकिरणतत्तमणिभूमियासु एत्थ य तुरंगममुहीओ । गंतुमपारंतीओ, गरुसेणिथणेसु रूसंति ।। ३०९९ ।। इय विविहच्छेरयसन्निहाणसंजणियचित्तहरणस्स ! मह एएण नगेणं, हरिया अन्नत्थगमणमई ।। ३१०० ।। इय चिंतिऊण राया सेणाहिवइस्स सम्मुहं भणइ । एत्थेव गिरिसमीवे चिंतसु सेणाइ विणिवेसं ॥ ३१०१ ॥ पुव्वं चिय पुरिसेहिं, मह भणिओ आसि एस मणिकूडो । रमणीययानिहाणं, बहुविहअच्छेरयावासो ॥ ३१०२ ॥ तो विणओणयसीसो, सेणाणी भणइ देव ! जो तुम्ह । आएसो सो कीरइ, इय भणिय पलोयए ठाणं ॥ ३१०३ ।। सुलहिंधणजलजवसं, दतॄणं तं च तक्खण च्चेव । कडयनिवेसं कारविय तयणु संपाडई रन्नो ॥ ३१०४ ।। तो पेच्छंतो घणकुसुमपरिमलुप्पीलवासियदिसाओ। गिरिपडपरूढबहुविहतरुवरवीहीओ नरनाहो ॥ ३१०५ ।। संचलिओ निययावाससम्मुहमहुन्हकिरणतावेण । मज्झन्हवत्तिणा जणियसेयबिंदूविसच्छाओ ।। ३१०६ ॥
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |