Page Text
________________
पउमनाहनिवो
११३
जाव अहं ताव तुमं सयमेवुवगिन्हिऊण तं हत्थिं । मज्झावेक्खारहिओ ठिओ सि न हु जुत्तमेयं ति ॥ २९२४ ।। इय तुज्झ मए कहियं जं जाणसि तं करेसु अत्तहियं । नीइरयणागरो तं न होसि जं सिक्खणिज्जो त्ति ॥ २९२५ ।। एवं च जइ वि एवं तह वि हु गुणपक्खवायओ तुज्झ । पभणामि किं पि तमहं परिहवणिज्जो न होसि जओ ॥ २९२६ इय बहुवयणं अवगम्म होसु नमिरो समप्पसु गयं तं । मोत्तुं उयहिं रयणाण ठाणमिह जं न हुति दहा ।। २९२७ ।। दाही अवरे वि गए एक्केणिमिणा पसाइओ सामी । रुट्ठम्मि तम्मि पुण तुह न एस होहिंति न हु अन्ने ॥ २९२८ ।। मोत्तूण ताऽभिमाणं गंतुं पहुपायवच्छलो होसु । करिलाभे पुण लुद्धो इमेण मूलं पि हारिहिसि ।। २९२९ ॥ अहयं पि तहा भणिहामि तं जहा तुज्झ अविणयं खमिही । मह वयणेणं जम्हा जलं पि दुद्धं तहिं होइ ।। २९३० ॥ तो जइ हियमिच्छसि अत्तणो तुम ता करेसु मह भणियं । अह न वि तो नियरमणीण रहसि चाडूणि कुण गंतुं ॥ २९३१ तो वयणमक्खिवंतो सगव्वमिइ तस्स वइरिदूयस्स । नरनाहदिह्रिसन्नाए सन्निओ भणइ जुवराओ ।। २९३२ ।। रे दूय ! पसमविणयप्पहाणवरनीइजुत्तिसंजुत्तं । को अन्नो तुमं मोत्तुं भणेज्ज एयारिसं वयणं ।। २९३३ ॥ कह तस्स तुज्झ पहुणो घरम्मि लच्छी न होज्ज पउरयरा । जस्स सया सन्निहिया तए सरिच्छा पवरपुरिसा ।। २९३४ जइ पुन्नवसेण करी गिहमम्ह समागओ कह वि एक्को । ता कीस एत्तिएण वि तुह पहुणो अक्खमा जाया ॥ २९३५ सप्पुरिसाणं छज्जइ न मच्छरो एरिसो कह वि काउं । पररिद्धिं पेच्छंताण ताण जं सोक्खमहिययरं ॥ २९३६ ।। अम्ह किर अक्कमो ताव एस निययं अदाउकामाणं । परवत्थुजिगीसंताण तुम्ह किं भन्नउ कमस्स ।। २९३७ ।। उवउज्जइ कत्थ इमं वयणं जमहं कमेण एत्थ पहू । खग्गबलेण जओ खलु भुज्जइ पुहई न उ कमेण ॥ २९३८ ॥ न य एस कमो वि इहं जं घेप्पइ दुब्बलाओ बलिएणं । पुन्नोवलद्धहयगयरहाइ काउं बलक्कारं ॥ २९३९ ।। अह न बलामोडीए मग्गइ सो किंतु पणयभणिईए । तो किं भयोवदंसीणि भणइ वयणाणि णे एवं ।। २९४० ॥ अवि य परवारणा किं न वारणा संति तस्स के वि घरे। किंतु मिसेण स इमिणा अम्हे अभिभविउमभिलसइ ॥ २९४१ बलवं जो अहमेवं दप्पो सो वि हु न तस्स खेमकरो । अहियक्कमो वि अहिओ हरिस्स घणघणो जेण ।। २९४२ बलगव्वेण य गरुयाण लंघणं निप्फलं विहेउमणो । सयमेव खलो मुणिही दुब्बलबलियाण सविसेसं ।। २९४३ ॥ अवि य उवेच्चकुणं तुज्झ पहुं सुत्तसीहपडिबोहं । किं न हणइ मह ताओ निवारणी होज्ज जइ न खमा ।। २९४४ ।। जओजो हणइ अरिं अभिउंजिऊण सविसेसओ उ अभिउत्तो। सयमेव दहइ दहणो किं पुण पवणेण परियरिओ।। २९४५ ।। अन्नं च - विजिगीसिज्जइ सत्तू खयवं वसणी व दिव्वहयगो वा । के गणिया तुह पहुणा जिगीसुणा तेसु भण अम्हे ।। २९४६ ।। गरुए रिउम्मि पियमिच्च साहगं होइ न उण हढकिरिया । तुह पहु इमं पि न मुणइ कुओ मयंधाण सन्नाणं ।। २९४७ अवरं च तुज्झ नाहो भुंजइ रज्जं अकंटयं तस्स । सामत्थेणं जइ मह न होज्ज सामी सयणुकूलो ।। २९४८ ।। मह पहुसंकाए च्चिय सत्तूहिं न परिभविज्जई एसो । काविलपुरिस्स व किं इमस्स न हु मुणसि निग्गुणयं ॥ २९४९ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |