Page Text
________________
हिरिमइदेवी अंगाणं परिरंभो अहरस्स य खंडणम्मि संवरणं । मुद्धाहिं जं विहिज्जइ, पिएसु लज्जालुयत्तेण ।। २४६२ ।। तेणं चिय ताओ मणोहराओ तेसिं हवंति अहिययरं । विवरीयसहावो च्चिय, कामो अहवा पसिद्धमिणं ।। २४६३ (जुयल) करचरणताडणेहिं, दंतग्गहनहविलेहणेहिं च । दुक्खाई जाइं ताई वि, सुहाई कामीण ही मोहो ।। २४६४ ।। पणएण माणिणी पणमिऊण पाएसु तोसिया संती । गाढं आलिंगइ मयणविहुरमह पिययमं का वि ।। २४६५ ।। भालयलरइयतिलयं कवोलथणलिहियचित्तपत्तलयं । चाडुसए कुणमाणं तरुणजुवाणं नियपियाए । २४६६ ।। दटुं व रयणिनाहो आरूढो गयणमंडलुद्देसे । भणइ व पसारियकरो, पेच्छइ रागीण ललियाई ।। २४६७ ॥ कीय वि कयसंकेओ, रविअत्थमणे पिओ न संपत्तो । जामे वि जामिणीए, गयम्मि अन्नाए आसत्तो ॥ २४६८ ॥ तो तीए विरहदवदहणदज्झमाणाए गरुयदुक्खेण । जाया सहस्सजाम व्व विस्सुया जा तिजामा वि ।। २४६९ ।। सच्चं अमयकरो च्चिय सन्निहियपियाण एस केसि पि । विरहीण पुणो सच्चेण (विसं ?) रयणीयरो एस ॥ २४७० जेसि न वल्लहा न य विओयदुक्खं खणं पि वसइ मणे । तेसि कलहोयमउ व्व दप्पणो अणुभयसहावो ।। २४७१ ।। इय एगसहावो च्चिय अणेगरूवत्तणं पयासिंतो। कहइ व्व सयलवत्थूण णेगधम्मत्तमणिपयर्ड ।। २४७२ ।। अह बहुलीलाहिं विलासिणीहिं सह विलसिरं जणं दटुं। ईसाइ व उत्थरिया निद्दा पियपणइणिसरिच्छा ।। २४७३ ॥ तीए निरुद्धदिट्ठीविवससरीरो तहा कओ एसो । वेएइ जह न सोक्खं, न दुहं न परं न यत्ताणं ।। २४७४ ।। राया वि विहियतवेल्लउचियकायव्ववित्थरो पच्छा । मंतीण अभिप्पायं निययं सव्वं कहेऊण ॥ २४७५ ।। वासहरमणुप्पत्तो सह देवीए ससिप्पहाए तहिं । इट्ठविणोएण खणं ठाऊणं सेवए निदं ।। २४७६ ॥
अह रयणीअवसाणे, उच्छलिए मंगलिक्कहेउम्मि । पाहाउयतूररवे खणमेत्ताओ य उवसंते ॥ २४७७ ।। रयणी गलियप्पाय त्ति चिंतिउं पविसिऊण अत्थाणे । मागहजणो पयट्टो पढिउं गंभीरसद्देण ।। २४७८ ।। निम्मलदिट्ठिप्पसरावहारकरणेण सावराहं व । रयणिच्छलेण अन्नाणतिमिरमोसरइ तुह देव ! ।। २४७९ ।।
अन्नं च - सुपसत्थहत्थसुस्सवणभूसियं सोहियं पुणव्वसुणा । चित्ताभरणधणिट्ठाहि माणजेठंकियं दद्धं ॥ २४८० ॥ लुद्धो हरिउ मणो पासिऊण सुत्तं जणं इमं सयलं । घेत्तूण निसं रमणि व्व जाइ निव ! एस रयणियरो ॥ २४८१ ।। (जुयल) अवि य - संपुन्नं अकलंक सया वि उदिओदयं तुह मुहिंदुं । दठूण व लज्जंतो चंदो उय जाइ अवरदिसं ॥ २४८२ ।। तहा - नीलमिव कुट्टिमम्मि व गयणयले तारए रयकण व्व । पयडियबहुयरवाया, पमज्जिउं जाइ रयणिवहू ।। २४८३ ।। अपरं च - पडिचंदस्स व पडिबोहउदयलच्छि निए वि तुह राय !! सह निसपियाइ पविसइ, ससी ससंको व्व अवरुदहिं ।। २४८४ सिंदूरछुरियसीमंतय व्व संझाए सहइ पुव्ववहू । ता पसिय पसिय सामिय ! मुंचसु सयणीयमेत्ताहे ।। २४८५ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |