Page Text
________________
हिरिमइदेवी इय मुणिवयणाई निसामिऊण मुच्छानिमीलियच्छिजुया । पेच्छंताण वि अम्हाण झ त्ति पडिया महीवढे ।। २३०४ ।। मुच्छावसवियलतणुं, पलोइऊणं तओ इहम्हेहिं । नियजणसयासमेसा आणीया ताओ ठाणाओ ॥ २३०५ ॥ एत्तो परं अवत्था पच्चक्ख च्चिय इमीए तुम्हाण । इय भणिऊण ठिओ सो तुण्हिक्को सोविदल्लो त्ति ॥ २३०६ ।। तो रन्ना नियहत्थेण चेव संवाहिऊण से अंगं । चिहुरकलावो बद्धो, मुहाओ फुसिया य सेयकणा ॥ २३०७ ।। जाओ वि ससिप्पहापमुहपवरदेवीओ चक्कवट्टिस्स । ताओ वि तग्गुणपउणीकयाओ उवयरिउमाढत्ता ॥ २३०८ ।। तहा हि - का विउ करेड वायं सीयलजलसित्तकेलिपत्तेहिं । का वि अइसिसिरगोसीसचंदणरसेण सिंचेइ ॥ २३०९ ।। नवनलिणगब्भसोमालकरयलेहिं परा उ से अंगं । संवाहेति पयत्तेण का वि सिचयाई ठावेइ ।। २३१० ।। हिरिमइदेवी वि पलोइऊण पासम्मि सामियं निययं । लज्जासज्झससंखुद्धमाणसा ठवइ अप्पाणं ॥ २३११ ॥ उवविट्ठो से पुरओ, तओ य आभासिया नरिंदेण । कीस पिए ! विमलविवेयरुद्धहियया वि मोहगया ॥ २३१२ ॥ तो भणइ इमा पिययमा, जाईसरणं महं समुप्पन्नं । तेण मए सव्वं पि हु, विन्नायं मुणिवराइटें ।। २३१३ ॥ तहा हि - जं विहियं मुणिभावे, जस्स विवागेण इत्थिया जाया । कप्पम्मि महासुक्के, देवत्ते जं च अणुभवियं ॥ २३१४ ।। करयलगयामलं पिव तं मह पच्चक्खमिव समग्गं पि । संजायं जाईसरणविसयभावेण नरनाह ! ।। २३१५ ।। तेण य संखोहेणं, मुच्छा जाय त्ति भणिय जाव ठिया । नरवइणा ताव इमा, पणएण पुणो इमं भणिया ।। २३१६ ।। सुंदरि ! धन्नो अहयं कयपुन्नतमाण तह य सीमा हं । भवकद्दमम्मि खुत्तो उद्धरिओ जो तए अहयं ।। २३१७ ।। जम्हा पुराकयाणं पुन्नाणं पयरिसं अवगमेइ । निम्मलकारणवग्गस्स एत्थ लाभो महाभाए ॥ २३१८ ॥ कारणअणुरूव च्चिय कज्जुप्पत्ती जणे वि पयडमिणं । न हु कलमसालिबीयाओ जायए कोद्दवंकूरो ।। २३१९ ।। तुमए समं कलत्तं, अओ मए पावियं जमेत्थ भवे । इहपरलोए य सुहेक्ककारणं धम्मुवुड्ढिकरं ॥ २३२० ।। तत्तो च्चिय जाणिज्जइ, पुव्वभवे पुन्नपयरिसो गरुओ। आवज्जिओ मए खलु,, पुणो वि पुन्नाणुबंधकरो ।। २३२१ ।। अन्नं च देवि ! जह तुह मुच्छा न हवेज्ज तो कहं तुज्झ । चरियं अइसच्चरियं, सवणपहमुवेज्ज अम्हाण ।। २३२२ ।। जं निसुणिज्जंतं पि हु, रागीण वि जणइ गरुयवेरग्गं । विज्झवइ कसायदवं, निन्नासइ मोहतिमिरोहं ।! २३२३ ।। जं गुरुयणप्पसाएण होज्ज कम्माण खयउवसमेण । सुविसुद्धसिद्धसिद्धंतसारबोहाओ विबुहाण ॥ २३२४ ।। तं पयईसिद्ध चिय तुज्झ सरूवं उवाहिनिरवेक्खं । सयलस्स जीवरासिस्स देवि ! एगंतसुहजणयं ।। २३२५ ।। अज्ज अउ च्चिय अहयं भवनिवहोवज्जियस्स कम्मस्स । मन्नेमि खयं असुहस्स असुहपावाणुबंधिस्स ।। २३२६ ।। जं मज्झ मई एवं, फुरिया जह रज्जमिणमसारयरं । रविकिरणतत्तमरुभूमिसलिलकल्लोलवंदं व ॥ २३२७ ॥ तहा हि - को हं इह किं रज्जं, के निहिणो काओ एत्थ रमणीओ। के रायाणो काणि व इमाणि रयणाणि चोद्दस वि ।। २३२८ ।।
Jain Education International
For Private & Personal Use Only
www.jainelibrary.org
| SR No. | 001587 |
| Book Title | Chandappahasami Chariyam |
| Original Sutra Author | Jasadevsuri |
| Author | Rupendrakumar Pagariya, Jitendra B Shah |
| Publisher | L D Indology Ahmedabad |
| Publication Year | 1999 |
| Total Pages | 246 |
| Language | Prakrit |
| Classification | Book_Devnagari, Story, & Biography |
| File Size | 17 MB |