Page Text
________________
सिरिमुनिसुव्वयर्जािणदचरियं
आगंतूणं तं कुंभकारकडनयरमग्गिणा सव्वं । सजणवयं सनरवइं सबालगं चेव निड्डहइ ॥१०२१२।। सो तेत्तिओ वि देसो दड्ढो संतो सुरेण सव्वो वि । जाओ जणम्मि डंडयअरन्नमिय नामधेएण ।।१०२१३॥ इय कहियम्मि भगवया सदेवमणुयासुरा वि सा परिसा । खंदगसीसाण खमागुणेण विम्हियमणा संती।।१०२१४।। नियसीसाइं धुणंती मउलियपाणी करेइ पणिवायं । तेसि मुणिवसभाणं तहा वि साहियसकज्जाणं ।।१०२१५।। चितइ य कसायाणं माहप्पमईविरसपरिणामं । इह परलोए य परस्स अप्पणो गुरुदुहनिमित्तं ।।१०२१६।। तत्थ बहुया वि मणुया परिभाता तहाविहसरूवं । संसारस्स विरत्ता दिक्खं गिन्हंति जिणपासे ।।१०२१७।। केइ गिहत्था वि ठिया नियमं गिन्हंति कोवकरणस्स । वेराणुबंधपरिणामसंकिया कंपमाणमणा ।।१०२१८॥ अह मुणिसुव्वयसामी तत्तो अन्नेसु गामनयरेसु । कुणइ कमेण विहारं पडिबोहंतो भवियवग्गं ।।१०२१९।। अन्नसमयम्मि पत्तो रायगिहे विहरमाणओ भयवं । नीलगुहावणसंडेसमोसढो फासुयपएसे ॥१०२२०।। उज्जाणवालएणं गंतुं वद्धाविओ तओ झत्ति । तित्थयरागमणनिवेयणेण दक्खो महाराया ॥१०२२१।। तेणावि तस्स वद्धावयस्स तु?णं रययलक्खाई। बारस उ दावियाइं पन्नाससहस्स अहियाइं ॥१०२२२॥ तो संवहिऊण सयं नीसेसाए वि नियविभूईए । तित्थयरवंदणत्थं दक्खनिवो नीइ नयराओ ।।१०२२३।। गंतूण तत्थ हत्थिक्खंधाओ ओयरेइ दूराओ । पविसेइ समोसरणे पंचविहेणं अभिगमेणं ।।१०२२४।। तिपयाहिणीकरेउं नमिउं थुणिउं च जिणवरं तत्तो। तित्थं मुणिणो नमिउं उचियपएसम्मि उवविसई।१०२२५। भयवं पि तित्थनाहो सूरमणयसमन्नियाए परिसाए। पूरओ साहइ धम्म मणिसावयभेयओ दुविहं ।।१०२२६।। तं सोऊणं बहवे संबुद्धा पाणिणो वयं के वि । देसविरइं च केवि सम्मत्तं के वि पडिवन्ना ।।१०२२७।। इय पइदिणं पि भयंवं करेइ भवियाण तत्थ उवयारं । अन्नदिणे सुव्वयमुणिमसेससुत्तत्थपारगयं ।।१०२२८।। नाऊणं सूरिपए सिरिमणिसुव्वयजिणेसरो ठवइ। सह पव्वइयमुणीणं पंचसए तस्स परिवार ॥१०२२९।। अप्पेऊण विसज्जइ तमियरठाणेसु विहरणनिमित्तं । वच्चइ सो वि सगुरुणो तह त्ति पडिवज्जिउं आणं।१०२३०॥ मुणिसुव्वओ वि अरहा अणेगसुरकोडिपरिवुडो तत्तो । रायगिहाओ नयराओ नीहरेऊण बाहिम्मि ।।१०२३१।। विहरइ भवियसरोरुहसंडाण विबोहणं कुणेमाणो। एत्तो य हत्थिणउरे पत्तो परिवायगो एगो।।१०२३२।। कत्तियसेट्ठि कहा-- सो मासं मासेणं खविऊण सया वि पारणं कुणइ । तो तस्स नयरलोओ आउट्टो कुणइ बहुत्ति ।।१०२३३॥ पविसइ पारणहेउं जम्मि दिणे एस नयरमज्झम्मि । तइया नियनियठाणाओ उट्रिऊणं नयरलोओ।।१०२३४।। गुरुसंभमेण पणमइ तं चरणोवरि निहित्तनियसीसो । भमइ य पट्ठिविलग्गो तवेण रंजियमणो तस्स।।१०२३५।। तत्थऽत्थि तया सेट्ठी कत्तियनामो पभूयविहवपहू । नाणामणिरयणहिरनमाइपडिपुन्नभंडारो ।।१०२३६।। अब्भुद्धारो दीणाणाहाइ जणाण सुद्धववहारो । रायाइमाणणिज्जो समग्गनेगमणपहाणो ॥१०२३७।। अइपरमसम्मदिट्ठी जिणिन्दसासणवियारविउलमई । जाणियजीवाजीवो सुविणिच्छियपुनपावो य।।१०२३८।। आसवसंवरनिज्जरचउरो कुसलो य बंधमोक्खेसु । तह अद्विमिंजपेम्माणुरायरत्तो जिणमयम्मि ।।१०२३९।। जह सो ससुरिंदेहिं वि देवेहि जिणिदभणियधम्माओ । चालेउं नो तीरइ मेरु व्व महासमीरेहि ।।१०२४०।। वारसभेयम्मि वि सावयस्स धम्मम्मि पइखणं चेव । चित्तम्मि अप्पमत्तो दूरपरिच्चत्तमिच्छत्तो ।।१०२४१।। एसोनियहट्टठिओ पुरो वि तं पासिऊण वच्चंतं । परिवायगं न भुमयामेत्तं पि हु नामए तस्स ।।१०२४२।। अन्नत्थ खिवइ दिटुिं न पेक्खए सम्मुहं पि एयस्स । तस्सुवरि तओ एसो कोवं परिवायगो वहइ ।।१०२४३।। अन्नम्मि दिणे राया जियसत्त् तस्स पारणदिणम्मि । परिवायगस्स पासे वच्चइ पणमइ य विणएण ।।१०२४४।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |