Page Text
________________
सिरिमुनिमुब्वयजिणिदपरियं
३०५
कत्थ वि निग्गयमेत्ता सयणिज्जनिवन्नया य कत्थ वि य। कत्थ वि जणणीअंगम्मि संठिया मच्चुमुहमेंति।।९८२०।। कत्थ वि चंकमणखमा कत्थ वि अव्वत्तजंपिरा संता । कत्थ वि बालेहि समं कीलणजोग्गा विवज्जति।९८२१।। कत्थ वि जोव्वणभिमुहा अणेगरोगेहि गहियसव्वंगा। अक्कंदिऊण बहुविलविऊण सदुहा विणस्संति ।।९८२२।। कत्थइ जोव्वणपत्ता पाणवहाई अगम्मगमणाई । काऊण अकिच्चाई चियबहुपावा विवज्जति ।।९८२३।। एवमणारियमणुयत्तलाभओ आरओ वि हु गएसु। पोग्गलपरियट्टेसुं अणंतणतेसु कह वि तओ ।।९८२४॥ आरियखेत्ते अंतयकुलेसु मणुयत्तणाइ तह चेव। लहिउं लहिउं अंतरअंतरओ नरयतिरिएसु ॥९८२५।। कालमणंतं पुण परियडंति सुकुलेसु मणुयजम्मस्स । सम्मुहमवि नो ठाउं लहंति गुरुकम्मयावसओ।।९८२६।। इय पुव्वत्तं कालं भमिऊण कहं चि सोहणकुलेसु । उप्पज्जति य बहुसो भमंति तह चेव णंतभवं ।।९८२७।। नवरं गालिज्जति य गम्भाओ ओसहेहिं असईहिं । कत्थ वि य जायमेत्ता छडिज्जति य कुरच्छासु ।।९८२८॥ तत्थ छुहाए सीयायवेहिं पावंति जीवियविणासं । मज्जारमाइएहि खज्जति व जीवमाणा वि ।।९८२९।। जह सुकुलुप्पत्तीए सुजाइलाभे वि तह भवमणतं । जीवा भमंति एवं रूवबलाईण लाभे वि ।।९८३०।। मझ मज्झेण अणंतकालभवभमणपुव्वयं होइ । जा आउअरोगत्तणविन्नाणसमनिया होंति ॥९८३१।। तो एरिसा वि होउं कत्थइ फासिदियस्स दोसेण। कत्थइ रसगिद्धीए कत्थइ गंधप्पियत्तेण ।।९८३२।। कत्थ वि य पवररूवालोयणलोलत्तणेण कत्थ वि य । सुंदरसदायन्नणतन्हापरतंतभावेण ॥९८३३।। कत्थइ कोहग्गिवसा कत्थइ माणद्दिथद्धयाए य । कत्थ वि य कुडिलनियडीवंसिकुडंगीगहणयाए ।।९८३४।। कत्थइ लोहमहोयहि निमज्जणणं च कत्थ वि पियस्स । विरहविहरत्तणणं कत्थ वि पेमग्गहगहेण ।।९
९८३५।। कत्थइ धणतन्हाए कत्थइ दालिद्ददुहनिदाहेण । कत्थइ किवणत्तणओ कत्थइ कलहाउलत्तेण ।।९८३६।। कत्थ वि य दुन्विणीयस्स नियकुडुंबस्स संठवणयाए । कत्थ वि तिव्वयरमहामिच्छत्तोदयविडंबणओ ।।९८३७।। सव्वं गमिऊण मुहा भमन्ति नरयाइयं पुणो वि भवं । कालमणतं तत्तो कयाइ देवेसु उप्पन्ना ।।९८३८।। कारिज्जति महिड्ढियदेवेहि सया वि ते नियं आणं । दूमिज्जंति य देवत्तणेण हीणेण नियएण ।।९८३९।। इयरसुराणं इड्ढि अहियं दळूण निययहिययम्मि। ईसाणलेण उज्झंति तह य घेप्पति अरईए ।।९८४५ । अप्पिड्ढियत्तणेणं परस्स रयणाई तह कलत्ताई। हरिऊण जंति तत्तो हम्मति सिरम्मि वज्जेण ।।९८४१।। ते अणुहवंति तत्तो अइगरुयं वेयणासमुग्घायं । निवडंति अट्टझाणे झीणे आउम्मि मरिऊण ।।९८४२।। एगिदिएसु भुज्जो उप्पज्जेऊण पुव्वनाएण । संसारमणतं परिभमंति दुक्खानलुज्जलिया ॥९८४३।। एवमणते पोग्गलपरियट्टसहस्सकोडिलक्खे उ । मिच्छत्तंधा जीवा चियघणकम्मा भमंति भवे ।।९८४४।। तं नत्थि कि पि ठाणं लोए वालग्गकोडिमेत्तं पि। जम्मि न जाया न मया अणंतसो जंतुसंघाया ।।९८४५।। तं नत्थि विसयसोक्खं दुहं पि तं नत्थि किं पि तज्जणियं । जीवेहिं जं न पत्तं अणंतसो कम्मवसगेहिं ।।९८४६।। एक्को च्चिय जिणधम्मो तेहिं न पत्तो कयाइ जस्स वसा । पुव्वुत्तभवदुहाणं जलंजलि देति ते झत्ति ॥९८४७॥ कम्मम्मि मोहणिज्जे कोडाकोडीओ होति अयराणं । सत्तरि उक्कोसठिई तह तीसं कोडिकोडीओ ॥९८४८।। कम्माण चउन्हें वेयणीयआवरणअंतरायाणं । नामस्स य गोयस्स य कोडाकोडीओ पुण वीसं ।।९८४९।। सत्तन्ह वि एयाणं कम्माण अहापवत्तकरणेण । खविऊणं सेसठिई सव्वं धरिऊण एक्कं तु ॥९८५०।। अयराण कोडकोडिं किंचूणं एत्थ अंतरे जीवा। घणरागदोसपरिणइरूवं पावंति तो गंठि ।।८९५१।। एयं च पत्तपुव्वा सव्वे वि इमे अणंतसो जीवा । किंतु न भिन्नो गंठी इमेहि सो जम्मि भिन्नम्मि ।।९८५२।।
Jain Education International
For Private & Personal Use Only
www.jainelibrary.org
| SR No. | 001564 |
| Book Title | Munisuvratasvamicarita |
| Original Sutra Author | Chandrasuri |
| Author | Rupendrakumar Pagariya, Yajneshwar S Shastri, R S Betai |
| Publisher | L D Indology Ahmedabad |
| Publication Year | 1989 |
| Total Pages | 376 |
| Language | Sanskrit |
| Classification | Book_Devnagari, Literature, & Story |
| File Size | 9 MB |