________________
सिरिमुनिसुव्वयजिणिदचरियं
२९७
बहुपुरिसज्जियसुइजसहरिवंसवडेंसओ सि तं जाया! । जच्चो सि खत्तिओ तं जाया! तं गब्भसुकुमालो।।९५५८।। अप्पडिमरूवजोव्वणलायन्नगुणालओ सि तं जाया! । जाया! तुमं सि अहियं सस्सिरिओ पीहणिज्जोय।।९५५९।। अहियं तुमं सि जाया! पलोयणिज्जो य पत्थणिज्जो य । देविंदरिंदेसुं पसरिय कित्ती सि तं जाया! ! ।।९५६० ।। तिक्खं चंकमियव्वं गरुयं आलंबियव्वमिह जाया! । असिधार व्व महव्वयमणुचरियव्वं तए जाया! ।।९५६१।। तं घडियव्वं जाया! परक्कमेयव्वमिह तओ जाया! । अस्सि च तए अट्ठे पमाइयव्वं न ह खणं पि ।।९५६२।। अह तव्वयणाणंतरमाह पहू एवमेव एयं ति । सयमेव पंचमुट्ठियलोयं तो कुणइ सो सामी ।।९५६३।। अह सक्को देविदो राया तियसाण ईसि नमियंगो। सामिस्स हंसलक्खणपडेण केसे पडिच्छेइ ।।९५६४।। सुरअसुरसिद्धगंधव्वनहयरागयणमग्गमोगाढा । जयजयरवमुहलमुहा मुयंति वासे सुरहिगंधे ।।९५६५।। तत्तो अणुजाणउ मे भयवं ति पभासिऊण देविदो। जिणकेसे नेऊणं खीरसमुद्दम्मि पक्खिवइ ।।९५६६।। तो मुणिसुव्वयसामी नमो त्थु सिद्धाणमिइ भणेऊण । सामाइयं चरित्तं पडिवज्जइ सुद्धपरिणामो ॥९५६७।। पडिवज्जते चरणं जिणम्मि सुरमणुयतूरनिग्घोसो। खिप्पामेव निलुक्को वयणेणं सक्कतणएण ।।९५६८।। सामाइयं करेमी सावज्ज सव्वमेव वावारं। पच्चक्खामी जावज्जीवं तिविहं पि तिविहेण ।९५६९।। इच्चाई उच्चारइ जाव पयं होइ वोसिरामि त्ति । नवरं भंते! त्ति पयं भयवं नो भणइ जीयं ति ।।९५७०।। छठेणं भत्तेणं सामी सामाइयं समारूढो । अवरन्हे तप्पभिई मणुस्सधम्माउ उत्तिन्नो ।।९५७१।। संपत्तो मणपज्जवनामं नाणं तओ तियसनाहो । सामिस्स अंसदेसे निवेसए देवदूसवरं ।।९५७२।। जम्मि समयम्मि सामी नियभवणाओ विणिग्गओ पढम। निक्खमिउमणो सीयं आरुहिउं विहियसिंगारो।।९५७३।। अन्नं पि तम्मि समए उत्तमखत्तियकुलेसु जायाण। रायसुयाण सहस्सं पुढो पुढो सीयमारूढं ।।९५७४।। कय उत्तमसिंगारं पत्तं चउपासठवियपरिवारं । सामिस्स सन्निहाणे आगंतुं तं पि नीलगुहं ।।९५७५।। जगगुरुणो पव्वज्जागहणविहाणाणुसारओ झत्ति । काऊण पंचमुट्ठियलोयं नियमत्थएसु तओ ।।९५७६।। जं एस पहू काही तं चिय अम्हे वि नूण काहामो । एयपइन्नापुवं जिणपव्वज्ज पवज्जेइ (ज्जेति? ) ।।९५७७।। सहसं पि रायउत्ता पसंसिया तो असेसतियसेहिं । भो साहु साहु भूवालनंदणा! जेहिं तुन्भेहि ।।९५७८।। पहमग्गो अणसरिओ अम्हे उण भत्तिमंतचित्ता वि। देवभवत्तणओ इय एवं काउं अजोग त्ति ।।९५७९।। इय भणिऊणं तेसि पि ते तओ निक्खिवंति वरवासे । भगवं तु काउसग्गे तत्थेव य ठाइ सेलो व्व ।।९५८०।। निक्कंपचित्तभावो धम्मज्झाणं झियाइउं लग्गो। तत्तो सक्काईया सव्वे वि सुरा जिणं नमिउं ।।९५८१।। नंदीसरवरदीवे वच्चंति कुणंति तत्थ तो महिमं । बावन्नाए जिणमंदिरेसु तित्थयरबिंबाण ।।९५८२।। पच्छा नियनियठाणेसु जंति सुब्बयनिवाइलोओ वि। नमिऊण तिजयनाहं रायसुयाणं सहस्सं च ।।९५८३।। पडिवनसामिसेवं पसंसिऊणं अभिक्खणं एवं । भो भो धन्ना भुवणे तुब्भे च्चिय दुक्करकरा य ।।९५८४।। सेवयधम्मपइन्नं पालयमाणेहिं जेहिं तुब्भेहि। दिक्खागहणे सामी विमुक्कविहवो वि न वि मुक्को।।९५८५।। तत्तो विम्हियहियओ जिणस्स तं सयलदेवनिम्मवियं। निक्खमणमहामहिमं सुमरंतो जाइ सट्टाणे।।९५८६।। अह दियहम्मि दुइज्जे हरिवंसकुलुब्भवो भुवणनाहो । नियवेलाए पविसइ भिक्खट्ठा रायगिहनयरे ॥९५८७।। तस्सेव कुसग्गपुरस्स अस्थि दुइयं पि रायगिहनामं । खिइवणउसभकुसग्गं रायगिहं एयवयणाओ ।।९५८८।। जुगमेत्तनिहियदिट्ठी उवउत्तों अणुपयं विसोहेंतो। अदुओ अविलंबियओ संभमरहिओ अगिद्धमणो ।।९५८९।। तम्मि नयरम्मि निवसइ धणधन्नसुवन्नरयणसुसमिद्धो । नामेण बंभदत्तो सुपसिद्धो गहवई एगो ।।९५९०।।
int
Jain Education International
For Private & Personal Use Only
www.jainelibrary.org