________________
८४
__परिशिष्ट तओ रन्ना आणाविओ जिणाणंद-पमुहो संघो भरुयच्छे, पवेसिओ महाविभूईए । वक्खाणिओ य मल्लवाइणा विहि-पुव्वेण नयचक्क-गंथो । एवं च तित्थ-पभावगो विहरिउं मल्लवाई गओ देवलोयं ति ।
। मल्लवाइ त्ति गयं ॥
जो उण मल्लवाई व पुव्वगयावगाही खमापहाणो समणो सो खमासमणो नाम, जहा आसी इह संपयं देवलोय-गओ जिणभद्दगणि-खमासमणो, विरइयाइं च तेण विसेसावस्सय-विसेसणवई-सत्थाणि जेसु केवल-नाण-दंसण-वियारावसरे पयडियाभिप्पाओ सिद्धसेण-दिवायरो ।
३. पादलिप्तसूरिकथा पालित्तयसूरि-कहा भण्णइ -
अत्थि इहेव भरह-खेत्ते कोसला नाम पुरी । तीए समिद्धो जण-मन्नो फुल्लो नाम सावय-सेट्ठी । समगुणा य से पडिमा नाम भज्जा । तीए य पुत्तो नत्थि त्ति वइरोट्ट-देवयाराहणत्थं पडिवनं पोसहं, वसिया य धम्म-जागरियं कुणंती पोसहसालाए । तब्भत्तिभरावज्जिया य रयणीए समागया वइरोट्टा देवी भणइ-'वच्छे ! होहिंति, परमिहेवावट्ठियाणं नागहत्थिसूरीणं पाय-सोय-सलिलं पिवेज्जासु ।'तओ गया देवी।
एसा य पहाए कय-किच्चा पउण-पहरुद्देसे गया सूरि-वसहिं । तत्थ य तीए पविसंतीए च्चिय दिट्ठो बाहिरभूमि-समागयाणं सूरीणं पाय-धोवणं घेत्तुं निग्गच्छंतो साहू । पुच्छिओ य - ‘किमेयं ?', सिस्सो भणइ-'सरि-चलण-सोउदगं ।' मग्गिउं च सहरिसाए तं तत्थेव पीयं तीए। तओ गया वसही-मज्झे, दिट्ठा य सहसा सुयखंघं परावर्तिता सूरिणो, वंदिया य परम-भत्तीए । धम्मलाभिउं च सा भणिया सूरीहिं-'सेट्ठिआणिए ! किमेगागिणी केणावि कारणवसेणागया ?'
साहिए य तीए जहा-वट्टिय-वुत्तंते सुओवउत्तेण सूरिणा समाइटुं तव्वेलानिमित्त-वसओ जहा-'भविस्संति ते पुत्ता, किंतु जे?-पुत्तो दस-वरिसं जवणानईओ पुरओ चिटुंतो जीविही ।' सोउं चेमं पडिमा भणइ-'भगवं ! पढम-पुत्तं तुम्हमहं सीसं दाहामि ।' सूरीहिं भणियं-'जह एवं ता तं चिरजीवियमम्हे काहामो ।'
Jain Education International
For Private & Personal Use Only
www.jainelibrary.org
