________________
७०१
गंधबंधुरकहा सम्मत्तजुया दोन्नि वि दिति सिवं तं पि मुणसु सम्मत्तं । गयरायदेव-निग्गंथसुगुरुनवतत्तसद्दहणा || ९००८ ॥ एगयरं पि असत्तो धम्म काउं करेइ भावेण । अट्ठप्पयारपूयं जिणाण जं सा वि सिवजणणी ॥ ९००९ ॥ नेवज्ज-कुसुम-अक्खय-दीवय-फल-सलिल-धूव-वासेहिं । इय अट्ठविहा पूया कया जिणिंदाण भवहरणी ॥ ९०१० ॥ अट्ठ वि काउमसत्तो सत्तो जइ कुणइ वासपूयं पि । तित्थेसरस्स ता जाइ तस्स पावं जओ भणियं ॥ ९०११ ॥ घणसारहरिणनाहीसुयंधवरवासखेवपूयमिसा । जिणपवणसंगमेण व पावरयं दूरमुड्डेइ ॥ ९०१२ ॥ ता धम्मसीलपत्तं मणुयत्तं मा मुहा तुमं नेसु । समुवज्जसु वासेहिं वि पूइत्तु जिणं परमपुन्नं ॥ ९०१३ ॥ इय सोउं सो धम्मदेसणं सूरिणो नमिय भणइ । पहु ! मह महापसाओ कओ इमं साहिओ धम्मं ॥ ९०१४ ॥ नूण निरीहा तुब्भे परोवयारेक्कबद्धवावारा । जं मह दरिद्दियस्स वि एयं धम्मं समाइसह ॥ ९०१५ ॥ इय जंपिय पणयगुरू गहियतणाई गओ गिहे नियए । कहिओ य भारियाए पूयाफलसवणवुत्तंतो || ९०१६ ॥ तीयुत्तमहम्मफलं पिय ! तुह सव्वं पि कुणसु ता धम्मं । जेण न भवंतरे वि हु विडंबणा एरिसी होइ ॥ ९०१७ ॥ तेणुत्तमिमं काहं ति जंपिउं गंधियावणम्मि गओ । तणभारयमुल्लेणं गहिया सव्वुत्तमा वासा ॥ ९०१८ ॥ तत्तो हिययम्भंतरवियंभिउद्दामभत्तिपन्भारो ।। जिणमंदिरम्मि चलिओ रयणमए तम्मि पत्तो य ॥ ९०१९ ॥ सच्छप्फालिहदीहरदंडेऽनिलपसरिया सियवडाया । जम्मि सुरेहिं वि नज्जइ सविम्हयं गयणगंग व्व ॥ ९०२० ॥
Jain Education International
For Private & Personal Use Only
www.jainelibrary.org
