________________
६५८
सिरिअणंतजिणचरियं
अकलंकं मज्झ कुलं सा वि पुणो पोढराइणी बाला । एसा वि विणयपणया किं काउं जुज्झए ता मे ॥ ८४५१ ॥ एगत्थ अकज्जभयं अन्नत्तो मरइ सा मए मुक्का । पासढुगे वि लग्गइ डमरुयगंठि व्व मज्झ मणं ॥ ८४५२ ।। जं होयव्वं तं होउ ताणुरत्ताए विरहविहुराए । काहं समीहियमहं इय चिंतेउं तओ तेण ॥ ८४५३ ॥ वज्जेउं मज्जायं मइलेडं निम्मलं जसप्पसरं । मुत्तं कुलाहिमाणं अणुसरिऊणं कुसीलत्तं ॥ ८४५४ ॥ चइऊणं सच्चरियं अंगीकाऊण नरयगइगमणं । उज्झेउं सद्धम्मं भणियं जं भणिसि तं काहं ॥ ८४५५ ॥ (जुयल) तं सोउं तीयुत्तं एसो विहिओ महापसाओ मे । इय जंपिऊण पत्ता पासम्मि धणावली एसा ॥ ८४५६ ॥ तं पइरिक्के काउं पयंपए सुयणु ! सुणसु वयणं मे । सा आह अंब ! जं किं पि जंपियव्वं तयं भणसु ॥ ८४५७ ॥ तीयुत्तमत्थि इह अत्थि सत्थपविइन्नअत्थवित्थारो । नामेण कित्तिसारो पुत्तो वणिअत्थसारस्स ॥ ८४५८ ।। रूवेण मयणमुत्तिं कंतीए कलावई मईए गुरुं । सक्कं सिंगारेणं जो जिणइ धणेण धणयं पि ॥ ८४५९ ॥ तेण तुमं सच्चविया नियमंदिरमत्तवारणासीणा । लीलालोयणलोयणजोन्हाभरपूरियदियंता ॥ ८४६० ॥ दिट्ठाए वि सुयणु ! तए मयणसरप्पयरपहरजज्जरिओ । भवणम्मि कहं कहमवि संपत्तो सो अणप्पवसो ॥ ८४६१ ॥ तं विरहज्जरविहुरं दहइ जलद्दावि जलणजाल व्व । संताविंति ससिकरा खइरंगार व्व तस्स तणुं ॥ ८४६२ ॥ एमेव हसइ बालो व्व नियइ सुन्नं पिसायगहिओ व्व । नच्चइ गायइ पलवइ मइरामयमत्तमुत्ति व्व ॥ ८४६३ ॥
Jain Education International
For Private & Personal Use Only
www.jainelibrary.org
