________________
सिरिभुयणसुंदरीकहा ॥
किं एस मलयमेहो जक्खो नियरिद्धीविहि (ह) वसंपन्नो ।
अम्ह मणुस्साणं पि य जणओ व्व पयासइ सिणेहं ? ||८८०४ ।। किं पयइकरुणयाए ? अहवा वि मुणिंद! पुव्वभवजणिओ । अत्थि एयस्स नेहो ? मह साहसु कोउयं गरुयं' ||८८०५ ॥ तो भाइ वीरसेणो 'वच्छे! इह अत्थि कारणं गरुयं । तं तुह संखेवेणं कहेमि निसुणेसु एगमणा ||८८०६ || इय (ह) अत्थि भरहवासे कोसलविसयंमि सयलगुणकलिया । विजया नामेण पुरी रिद्धिसमिद्धा बहुजणा य ||८८०७ || तत्थासि उसदत्तो त्ति नाम वणिओ अनंतधणविहवो । तस्सासि कुलकलत्तं अणंतलच्छित्ति पियभज्जा ||८८०८ || जिणवयणभावियाणं ताण कमेणं सुओ समुप्पन्नो । नामेण धम्मदत्तो पवित्तगुणभूसियसरीरो ॥८८०९ ॥ सो बालभावओ च्चिय कम्मखओवसमभावजोगेण । आसन्न भव्वया विसएसु परंमुहो जाओ ||८८१०|| संपत्तजोव्वणो वि हु अणुवमरूवो वि असमविहवो वि । नीसेसतरुणनारीअहिलसणीओ वि अच्चत्थं ॥ ८८११ ॥ उवसमसुहसंपत्तो निग्गहियक्साय - इंदियप्पसरो । संसारसुहविरत्तो सयणेसु य अपडिबद्धो य ||८८१२ ॥ आपुच्छियमाउ-पिओ पासे सिरिसीलसेहरगुरुस्स । पव्वइओ जिणपवयणभणियविहाणेण धम्ममुणी ||८८१३ || अब्भसियसाहुकिरिओ नाणाविहतवविसेससुसियंगो । एकल्लविहारितं पडिवन्नो गुरुअणुन्नाए ||८८१४ ॥
Jain Education International
८०३
For Private & Personal Use Only
www.jainelibrary.org
