________________
७५८
सिरिभुयणसुंदरीकहा ॥ तुह विरहजलणदड्ढो बीयं तुहमरणपावमलकसिणो । अपवित्तो हं जाओ मसाणजाओ व्व अंगारों' ।।८३१०।। इयएवमाइबहुविहपलावसयदुत्थियं मलयमेहो । संधीरइ रायसुयं निच्छयसारेहिं वयणेहिं ॥८३११।। 'किं हरिविकूम! विक्कमधणो वि एवंविहाइं पलवेसि ? । जुयईणं चिय सोहइ नरिंद! एवं अणुट्ठाणं ।।८३१२।। पयईए कोमलाई कुमार! हिययाइं साहसधणाण । ताई चियावयाए कुलिसकढोराइं जायंति ।।८३१३।। जाणामि ओहिनाणेण कुमर! सिरिभुयणसुंदरी देवी । अच्छइ जीवंत च्चिय अविणट्ठसरीर-चारित्ता ॥८३१४।। ता अच्छ तुम इहइं अहयं पुण सयलभुयणवलयंमि । धूयं गवेसिऊणं अवस्स तुमए घडिस्सामि' ।।८३१५।। इय भणिऊणं जक्खो कुमरं आपुच्छिऊण गयणेण । नीहरिओ वेगेणं पवणो व्व अदीसमाणगई ॥८३१६।। हरिविकूमो वि दूसहदइयाविरहग्गिदाहसंतत्तो । तत्तकडिल्ले व गओ तल्लुवेल्लीओ विरएइ ||८३१७।। अह अन्नदिणे गुरुतरदइयादुहदाहदज्झमाणतणू । सेणाहिवेण भणिओ सप्पणयं वैरसीहेण ।।८३१८।। 'तुह देव! सयलसत्थत्थवित्थरुप्पन्नपरमनाणस्स । अम्हारिसोवएसा न किं पि कज्जं पसाहति ।।८३१९।। तह वि न अरिहसि काउं खेयं नरनाह! निप्फलारंभं । तुम्हारिसाण एवं दूरविरुद्धं जओ कम्मं ।।८३२०।।
Jain Education International
For Private & Personal Use Only
www.jainelibrary.org
