________________
.
सिरिभुयणसुंदरीकहा ॥
तो सा अमाणुसोच्चि(चि)यसुहुमयरमई पडिच्छयविसेसं । जं किं वि भुयणमज्झे विन्नेयं तीए तं नायं ।।७८३७।। विज्जा-विन्नाणगयं दिटुं च सुयं पि किं पि जं तीए । उवएसनिरावेक्खं पि झत्ति तं तीए संकमइ ।।७८३८।। दंसणमेत्तेण वि दिणयरस्स वियसंति किं न कमलाइं ? । दिसिदरिसणमेत्तं चिय विमलमईणं उवज्झाया ।।७८३९।। इय सा तियसासुर-जक्खलोयआणंदकारयं बाला । संपत्ता तारुन्नं विलोहणीयं तिलोयस्स ।।७८४०।। वणराइ व्व वसंतं सरयं व सरोइणी समहिगम्म । नियसमयं ललिउज्जललायन्नं जोव्वणं पत्ता ।।७८४१॥ संमोहणं व भुवणत्तयस्स विहेसणं व धम्मस्स । वसियरणं व सुरासुर-विज्जाहर-नरसमूहाण ॥७८४२॥ उच्चाडणं मुणीण वि हियएसु विवेयसुद्धभावाण । थंभणमिव भुवणस्स वि तिस्सा तारुन्नयं जायं ।।७८४३।। परपुरिसो व्व न सम्माइ तीए वच्छत्थले विसाले वि । थणपन्भारो तब्भारभुग्गसरलंगलट्ठीए ॥७८४४।। अइवियडनियंबाण वि सुरंगणाणं पि कंचिदामाइं । तिस्सा अपमाणनियंबमंडले नो पहुप्पंति ॥७८४५।। कप्पूरपंसुणा इव सव्वत्तो ससहरस्स जोण्हस्स । अमयच्छडं व पसरंति तीए सरलच्छिविच्छोहा ।।७८४६।। मयणघडिय व्व सरसा वियाररइय व्व पडिहयप्पयई । विलसंति तीए अंगे अउरुव्वा के वि य विलासा ॥७८४७।।
Jain Education International
For Private & Personal Use Only
www.jainelibrary.org
