________________
सिरिभुयणसुंदरीकहा ॥
७०१ अवहरउ किं व काही ? मह सामन्नाण निच्छयमणाए । नियसीलरक्खणं वा मरणं वा जीए इट्ठाई ।।७६८२।। सोओ वि कहं कीरइ जुयइसहावत्तणेण जो सुलहो । नियकम्मउवणयाई सोएण न जंति दुक्खाइं ॥७६८३।। ता जं जं मह होही दुक्खं संपाडियं सकम्मेहिं । तं तं चिय सहियव्वं मणखेयं अकयमाणीए' ||७६८४।। इय एवं चिंतंती चंदसिरी चंडकेउणा तेण ।। अवहरिऊणं नीया सिहरोवरि मलयसेलस्स ||७६८५।। ठविऊण तत्थ खयरो जा जोयइ रूवसंपयं तीए । विम्हयपसारियच्छो सहसा ठगिओ व्व ता जाओ ||७६८६।। 'अहह महच्छरियमिणं तिहुअणअब्भहियरूवगारविया । जस्सेसा पियभज्जा सफलं खलु जीवियं तस्स ||७६८७।। एसा उन्नयभूधणुविमुक्कतिख(क्ख)ग्गमयणबाणेहिं । ससुरासुर-मणुयाइं निज्जिणइ जयाई न हु भंती ||७६८८।। सइ संपुन्नस्स अलंछणस्स एयाए दोसरहिआस्स । ओयारणयं कीरइ इयरससी मुहमयंकस्स ||७६८९।।।। एयाए अइविसालं अच्चुन्नयगुरुपओहरक्तं । विज्जाहरामराणं गम्मं गयणं व वत्थयलं ।।७६९०।। बलिणा अकंतो इव विवरोक्खे वीरसेणरायस्स । झीणो इमीए मज्झो अहिययरं मज्झदेसो व्व ।।७६९१ ।। परिवियडनियंबत्थलपरिट्ठिओ ऊरुजुयलखंभद्धे । मयणो मत्तगओ इव निरंतरं वसइ एयाए ।।७६९२।।
Jain Education International
For Private & Personal Use Only
www.jainelibrary.org
