________________
६८३
सिरिभुयणसुंदरीकहा ॥
कम्माणुभावजणियं दुक्खं संभवइ सव्वसत्ताण । तक्कारणपरिहीणे सुहमेव निरंतरं मोक्खे ॥७४८४।। पावइ कम्मेहिं जओ वाबाहाओ निरंतरं जीवो । अव्वाबाहसुहं च्चिय मोक्खे उण कम्मनासेण ।।७४८५।। गेवेज्ज-णुत्तरेसुं अंतो सोक्खस्स होइ कम्मवसा । मोक्खे उण गयकम्मो अणंतसोक्खं लहइ जीवो ॥७४८६।। दुद्धच्छु-खंड-महु-सक्कराण अहियाहिओ जहा साओ । तह सव्वसुहाहिंतो अइरित्तं होइ सिवसोक्खं ॥७४८७।। इय अजरममरमक्खयमणंतमच्चंतसुहमणाबाहं । मोक्खसुहं नायव्वं जिणपवयणभणियमग्गेण ।।७४८८।। तो विहियगिहत्थोच्चियकरणीओ संपयं अणुचरामि । तुम्हाणुमईए अहं पव्वज्जं मोक्खसुहहेऊ' ।।७४८९।। तो भणइ वीरसेणो ‘एवमिणं देव! जह तए सिटुं । अकलंक-निम्मलेहिं वि एवं चिय सिवसुहं कहियं ।।७४९०।। ता इह परमत्थवियारणाए सोक्खं न किं पि संसारे । दुक्खे वि सोक्खबुद्धी जीवाण अहो महामोहो ! ॥७४९१।। सव्वाण वि उचियमिणं नरिंद! तुम्हारिसाण उ विसेसा । ता मा कुणसु विलंबं तुह सिद्धउ वंछियं कज्जं ॥७४९२।। जो देव! जलहिबुटुं देववसा पत्तपवहणं पुरिसं । उच्चल्लिऊण घेल्लइ पुणो समुइंमि सो सत्तू ।।७४९३।। तह भवसमुद्दपडियं पव्वज्जापवहणुज्जमंतं जो । विणिवारइ सो पुरिसो परमत्थरिउ त्ति विन्नेओ ।।७४९४।।
Jain Education International
For Private & Personal Use Only
www.jainelibrary.org
