________________
सिरिभुयणसुंदरीकहा ॥
६८१ इहरा सुमिणंतरभयपवुड्डसंताणजणियवित्थारो । निब्भरभयप्पकंपो अउरुव्वो को वि मह आसि ||७४६२।। ता पुत्त! विसमसंसारसायरो विसमदुहसयावत्तो । इह चेव भवे जाओ पयडो मह तुह विओएण ।।७४६३।। परमत्थभावणाए न किं पि सुहमत्थि एत्थ संसारे । दुक्खं चिय नीसेसं सकम्मपरिणामसंजणियं ॥७४६४।। बंधुसुहं विसयसुहं धणसुहमाईणि विसयसोक्खाणि । दुक्खनिमित्तत्तणओ दुहाई परमत्थओ होंति ।।७४६५।। जे बंधुसंगजणियं सोक्खं मन्नंति केइ मइमूढा । दुक्खत्तणेण तं च्चिय तव्विरहहयाण परिणमइ ||७४६६।। परिणामदुहसरूवं विसयसुहं जे सुहं ति मन्नंति । पामावाही वि न ताण दुक्खभावेण परिणमइ ||७४६७।। मूलं अणत्थतरुणो अत्थो च्चिय होइ सव्वसत्ताण । मूढाण तह वि अत्थे अउरुव्वो को वि पडिबंधो ||७४६८।। जं पेरंते गुरुदुक्खकारणं तं न होइ इह सोक्खं । दुक्खं च्चिय तं अन्नह कारणकज्जोवयाराओ ।।७४६९।। जह कसविसुद्धरेहं दाह-च्छेदेहिं विहडियं हेमं । विबुहेहिं परिचइज्जइ दुक्खनिमित्तं तहा सोक्खं ।।७४७०।। जह मुहमहुरं परिणामदारुणं दुज्जणं जणो चयइ । तह परिणइजणियदुहं पमुहसुहं परिहरेयव्वं ।।७४७१।। कयअप्पसंकिलेसं बहुजणसंजणियसंकिलेसं च । पेरंतकिलेसफलं जइ तंपि सुहं दुहं किं नु ? ||७४७२ ।।
Jain Education International
For Private & Personal Use Only
www.jainelibrary.org
