________________
सिरिभुयणसुंदरीकहा ॥
६६७ तो वीरसेणराया पिउभत्तिसमुल्लसंतरोमंचो । नियभत्ति-सत्तिसरिसं वद्धावणयं करावेइ ।।७३१२।। वेयड्डोभयसेढीसु केइ जे खेयरेसरा संति । विज्जाहरीओ मणहरसरीरसिंगारलडहाओ ।।७३१३।। तह अद्धभारहमि य जे केइ महीहरा मउडबद्धा । मंडलिया सामंता रायाणो सव्वपरिवारा ॥७३१४।। आयन्नियसूरागमणजायहरिसुल्लसंतपुलयंगा । पत्ता चंपानयरिं अंतेउरपरिगया सव्वे ॥७३१५।। सव्वत्तो च्चिय सूरागमंमि उवसंतसोयसंतमसो । वियसंतवयणतामरससुंदरो सहइ जियलोओ ॥७३१६।। सुण्हा वि य चंदसिरी सहिया सिरिअमरसेणकुमरेण । पणमइ पणामविलुलंतकेसपासा सुसुरयस्स ।।७३१७।। पुत्तं पि अमरसेणं परिरंभइ चुंबई य सीसंमि । सकयत्थं मनंतो अप्पाणं पुत्तपुत्तेण ॥७३१८।। अहिणंदइ सप्पणयं विचित्तजसनरवई महाराओ । भणइ ‘भुयणे तुम चिय सुयणो पडिवन्नसूरो य' ||७३१९।। जह जह पेच्छइ पुत्तस्स विजियतियसिंदसुंदरं रिद्धिं । तह तह सूरो तप्पणइणी य हियए न मायति ।।७३२०।। अन्नोन्नसंगमुभवसुहरसपसरंतहरिसपसराण । वच्चंति ताण दियहा सुहेण आणंदघडिय व्व ।।७३२१।। अह अन्नया कमेणं आणंदियसयलभुयणवित्थारो । पत्तो वसंतसमओ वणप्फईपरमबंधु व्व ।।७३२२ ।।
Jain Education International
For Private & Personal Use Only
www.jainelibrary.org
