________________
६६३
सिरिभुयणसुंदरीकहा ॥
तो वीरो निस्सहोरक्खित्तमणिमउडकिरिणकब्बुरिए । जणयस्स नमइ चलणे पहावंतो अंसुधाराहिं ॥७२६८।। उम्मुकदीहधाहो पिउदंसणुल्लसंतवामोहो । इयरपुरिसो व्व वीरो उन्नमइ सिरं न चरणाओ ||७२६९।। तो तेण रुयंतेणं असंखसामंत-मंति-मंडलिया । सव्वे वि य रायाणो विमुक्कथोरंसुयं रुन्ना ।।७२७०।। तो महया कटेणं पिउणा पिउवच्छलो महावीरो । उभयकरुक्खित्तसिरो पुणो पुणो चुंबिओ सीसे ।।७२७१।। 'किं पुत्तय! रुन्नेणं ? इहरच्चिय पयडिओ पिउसणेहो । जंबुदीवाओ इहं एंतेणं धाइसंडंमि' ||७२७२ ।। तो वीरसेणसाहियवइयरकयबंधुयत्तपडिवत्ती । नियपुत्तनिव्विसेसं गोरवबुद्धीए पेच्छेइ ॥७२७३।। पुण भणइ सूरसेणो ‘आसाससु मायरं बहुदुहत्तं । नियदसणेण सुहियं करेसु पीऊसह(व)रिसेण' ॥७२७४।। एवं पिउणा भणिओ सिंगारवईए पडइ पाएसु । सा वि परिरंभिऊणं चुंबइ सीसे बहुसिणेहा ।।७२७५।। अंतोहुत्तवियंभियसिणेहथरहरियथूलथणवठ्ठा । नीहरियथन्नधारा हिययविसुद्धिं व दावंती ।।७२७६।। तो राय-रायपत्ती-सामंताईण सयललोयाण । नयणाई वीरसेणे खुत्ताइं व नो नियत्तंति ।।७२७७।। अउरुव्वरूव-सिंगार-लडह-लायन्न-गारवघ(ग्घ)विओ । ओसरइ खणं पि न सज्जणाण हिययाओ सूरसुओ ।।७२७८।।
Jain Education International
For Private & Personal Use Only
www.jainelibrary.org
