________________
६४४
सिरिभुयणसुंदरीकहा ॥ उम्मग्गदेसणरया गूढमणो(णा) माइणो ससल्ला य । इयमाइनिमित्तेहिं जीवा पाविंति तिरियगयिं ॥७०५९।। आरोवियबहुभारो न तरइ गंतुं पयं पि खरगोणो । कुट्टिज्जंतो उट्टो विरडइ अइनिग्घिणनरेहिं ॥७०६०।। ओसूणखंधवणनीहरंतरुहिरो सहेइ बलिवद्दो । जुत्तो सगडे दुक्खं आरपहारेहिं हम्मंतो ।।७०६१।। तण्हा-छुहाकिलंता दुब्बलदेहा य रोगिणो तिरिया । सीउण्हझडिकिलंता सहति विविहाइं दुक्खाई ।।७०६२।। पयईए तणुकसाया दाणपरा सील-संजमविहीणा । मज्झत्थगुणा जीवा मणुयगयिं भद्दया जंति ।।७०६३।। वस-मंस-रुहिर-फोफस-अमेज्झ-बहुमुत्तगब्भवसहिमि । वसिऊण नरयतुल्ले मंसपिंड व्व जायंति ।।७०६४।। बहुमुत्तासुइमज्झे रमंति धूलीए धूसरसरीरा । पत्ता जोव्वणभावं कामुम(म्म)त्ता परियडंति ॥७०६५।। ईसा-विसाय-मच्छर-पेसुन्न-पराहवाइं दुक्खाइं । दारिद्दिट्टविओया अणिठ्ठजोगा य रोगा य ।।७०६६।। पावेंति विद्धभावे मणुया दुक्खं जराए जज्जरिया । वलिपलियदंतवडणं अंधत्तं बहिरभावं च ।।७०६७।। नियपरियणपरिभूया कलत्त-पुत्तायएहिं अवगणिया । अज्जंति अट्टरोद्देहिं बहुविहं पावपब्भारं ।।७०६८।। इयमाइ बहुप्पयारं जीवा मणुयत्तणे वि अइभीमं । पावंति महादुक्खं पुवज्जियपावसंभूयं ।।७०६९।।
Jain Education International
For Private & Personal Use Only
www.jainelibrary.org
