________________
६४२
सिरिभुयणसुंदरीकहा ॥ खीणत्तं पि हु सोहइ अंतोनिक्कलुसयाए साहुस्स । न उण पयासियकलुसं संपुन्नंगं ससिस्सेव' ।।७०३७।। इय एवमाइ मुणिगयगरुयगुणभावणाए सुद्धप्पा । जा अच्छइ ता सहसा पेच्छइ लोयं समुच्चलियं ।।७०३८।। सविसेसकयविभूसं बहुविहपूओवगरणहत्थं च । तग्गुणकहाणुलग्गं पमोयसंजायपुलयं च ।।७०३९।। दठूण इंददत्तो लोयं नयरीओ बाहिरुच्चलियं । पुच्छइ नियपडिहारं 'कत्थेसो चल्लिओ लोओ ?' ||७०४०।। भणियं पडिहारेणं ‘देवेसो पत्थिओ जणो बाहिं । रविचंदसूरिपासे वंदणभत्तीए तस्सेय' ।।७०४१।। तो भणइ इंददत्तो ‘जइ एवं ता पयट्टह तुरंता । अम्हे वि तत्थ जामो मुणिंदपयवंदणं काउं' ।।७०४२।। तो सो कलत्त-पिउ-माय-बंधुपरिवारसंजुओ चलिओ । रविचंदचरणवंदणबुद्धीए विसुद्धपरिणामो ||७०४३॥ पत्तो गुरुस्स पासं पणमइ भत्तीए जायरोमंचो । गुरुणा वि धम्मलाहं दाऊण अणुसासिओ विहिणा ||७०४४।। तो पारन्द्रा गुरुणा जलहरगंभीरधीरसद्देण । सोउं सम्मुज्जयाए असेसपरिसाए धम्मकहा ।।७०४५।। 'जीवाण भवसमुद्दे परिभमंताण कम्मवसगाण । नीसेसं चिय दुक्खं सोक्खं पुण वासणाजणियं ।।७०४६।। सो वि य चउप्पयारो संसारो होइ गइविभेएण । नरय तिरियं च नर-सुरगईओ पुण होति चत्तारि ||७०४७।।
Jain Education International
For Private & Personal Use Only
www.jainelibrary.org
