________________
६२८
सिरिभुयणसुंदरीकहा ॥ तत्तो वि पुण कमेणं सिरिवद्धणपट्टणं च संपत्तो । तत्थागएण दिवो जणओ नियपरियणसमेओ ॥६८८३।। उत्तरइ अभयचंदो कुणइ पणामं पिउस्स पणयसिरो । पिउणा वि समवऊढो हरिसगलंतंसुनयणेण ॥६८८४।। अन्नोन्नं कुसलोदंतपुच्छणेणं कुणंति आणंदं । अन्नोन्नदसणेणं परिओसो ताण संजाओ ॥६८८५।। तो भणइ अभयचंदो 'कुसलं गुणचंदराइणो ताय!' । सेट्ठी भणइ ‘नरिंदो जयसिरिदुक्खेण अइदुहिओ' ।।६८८६।। तो कहइ अभयचंदो नीसेसं जयसिरीए वुत्तंतं । संजायमहाणंदो सेट्ठी हिययंमि परितुट्ठो ||६८८७।। उत्तारिऊण तीरे करेइ रासीओ पव्वयसमाओ । रयणाण अभयचंदो पिउणो मणविम्हयकराओ ।।६८८८।। तं सव्वं घेत्तूणं जयसिरिदेविं च अभयचंदं च । जसदेवो नियनयरं उच्चलिओ गरुयसत्थेण ।।६८८९।। अणवरयपयाणयसयविलंघियासेसपुहइवित्थारो । पत्ता उज्जेणिपुरि सव्वे वि अविग्घखलियेण ।।६८९०।। तो विन्नायसरूवो गुणचंदो एइ अभयचंदस्स । पच्चोणिं पुरपरियणपरियरिओ सेन्नसंपन्नो ।।६८९१ ।। महया संमद्देणं परमविभूईए परमनेहेण । पइसारइ सेट्ठिसुयं सलहिज्जंतं पुरिजणेण ।।६८९२।। तो सेट्टि-अभयचंदे नियगेहं नेइ नरवई हिट्ठो । उचियपडिवत्तिपुव्वं समप्पए जयसिरिं धूयं ।।६८९३।।
Jain Education International
For Private & Personal Use Only
www.jainelibrary.org
