________________
६२०
सिरिभुयणसुंदरीकहा ॥ गोमुत्तियाकमेणं समागओ कुल्लुरीयगेहमि । खत्तियगोत्तुप्पन्नो अरिदमणो नाम रायरिसी ॥६७९५।। तो तं महामुणिंदं अदीणचित्तं अणंतगुणगरुयं । दठूण अभयचंदो सहसा रोमंचिओ जाओ ।।६७९६।। चिंतइ 'असारसंसारसायरे विविहदुक्खपउरंमि । सकयत्थं अप्पाणं मन्नामि सुपत्तलाहेण ॥६७९७।। नवकोडीपरिसुद्धं दायव्वं तं पि मज्झ संपन्नं । चित्तं पि मज्झ संपइ दाणाभिमुहं पवढंतं' ॥६७९८।। इय नाणाविहसुपसत्थभावणाजायसुद्धपरिणामो । उच्चल्लिऊण थालं देइ मुणिंदस्स नीसेसं ॥६७९९।। परिभाविऊण मुणिणा 'सुज्झइ एयं' ति जायचित्तेण । 'मा होउ दायगस्स वि विसुद्धपुन्नंतरायं'ति ॥६८००।। गहियं पडिग्गहे तं पणमइ दाऊण अभयचंदो वि । मुणिचरणकमलधूलि(ली)धूसरियसिरो सुभत्तीए ॥६८०१।। सकयत्थं मन्नंतो अप्पाणं वहइ चित्तपरितोसं । साहू वि पडिनियत्तो अह जायं तत्थ अच्छरियं ॥६८०२।। गयणे पवज्जियाओ गहिरं सुरदुंदुहीओ सहस त्ति । पडिया दसद्धवन्नाण सुरकुसुमाण वुट्ठी वि ॥६८०३।। तयणंतरं च निवडइ मणीण रयणाण कंचणस्सावि । बुट्ठी पहिट्ठसुरवरकरमुक्का पत्तदाणेण ।।६८०४।। . त सो हिरन्न-मणि-रयणवरिसमसमं च संवरेऊण । दारिद्ददुहियदुत्थियजणाण साहारणं कुणइ ।।६८०५।।
Jain Education International
For Private & Personal Use Only
www.jainelibrary.org
