________________
६१७
सिरिभुयणसुंदरीकहा ॥
विहवे वि दरिदत्तं दासत्तं तिजयपहुत्ते वि । रूवं पि सिक्खवंति व अप्पकुरूवत्तबुद्धीए ॥६७६२।। सकलत्तेण वि जोगो जाण अकज्जं व होइ रयणीए । वेसो वि जाण पिसुणइ पसंतयं सव्वभावेसु ।।६७६३।। अन्नं च पुत्त ! वणिओ गम्मो सव्वस्स होइ पयईए । गुडपिंडओ व्व दिट्ठो सद्धं उप्पायइ जणस्स ।।६७६४।। जइ पुण रायविरुद्धं करेज्ज सो पुत्त ! केण वि नएण । छिदेण तेण पुत्तय ! होइ पवेसो खलयणस्स ।।६७६५।। एगं रायविरुद्धं कुल-जाइविलक्खणं भवे बीयं । तइयं च परकलत्तं इयमाई होंति इह दोसा ||६७६६।। निद्दोसे वि हु दोसं ठवंति जे पुत्त ! दुज्जणा होति । दोसंमि पुणो लद्धे ताण घरे उच्छवो होइ ॥६७६७।। अत्थखओ खलतोसो अजसो परपरिभवो अधम्मो य । सुयणाण अत्तणो वि य मणदुक्खं दुकयकम्मेहिं' ।।६७६८।। तो भणइ अभयचंदो ‘आयासिज्जइ किमेत्तियं अप्पा ? । नाऽहं ताय ! तहाविहकम्माणं कारओ होमि ।।६७६९।। जेण जणे लज्जिज्जइ तुम्हाण वि अजससंभवो होइ । तं पाणसंसए वि हु नाऽहमकज्जं करिस्सामि' ।।६७७०।। तो ‘साहु साहु पुत्तय !' एवं भणिऊण चुंबिओ सीसे । 'किं तुज्झ पुत्त ! भन्नइ पयइविणीयस्स सोमस्स ?' ॥६७७१॥ तो जाइ अभयचंदो सेज्जाहरयं विसज्जियवयंसो । तत्थुव्वेविरच्चि(चि)त्तो अट्टदुहट्टाइं चिंतेइ ॥६७७२।।
Jain Education International
For Private & Personal Use Only
www.jainelibrary.org
