________________
सिरिभुयणसुंदरीकहा ॥ अन्नोन्नपरमनेहाणुरायरसियाण ताण सुरलोए । निमिसद्धं व गयाइं तिन्नि वि पलियाई दोहिं पि ।।६७२९।। चविऊण तुमं सिरिवीरसेण ! एत्थेव जंबुद्दीवंमि । दाहिणभरहे मज्झिमखंडे उज्जेणिनयरीए ।।६७३०।। आसि जसदेवनामो नियधणसिरिविजियधणयधणनिवहो । नीसेसनयरपमुहो सेट्ठी सुविसिट्ठकुल जाई ।।६७३१।। तस्साऽऽसी पियभज्जा जसदेवी नाम विमलकुलजाया । पंचप्पयारविसए सह भुंजइ तीए सो सेट्ठी ।।६७३२।। गुणरायजीवदेवो चविऊणं तत्थ सेट्ठिभज्जाए । उव[व]न्नो कुच्छीए बहुपुन्नालंकियसरीरो ।।६७३३ ।। सा पच्छिमंमि जामे पेच्छइ सुविणयं सुहपसुत्ता । किरि पुन्निमामयंकं संकंतं तीए उयरंमि ।।६७३४।। तो सा सुविणयदसणसंभमसंजायतरलतारच्छी । जसदेवसिट्ठिणो कहइ सो वि आणंदइ सुएण ।।६७३५।। एवं तीए अणुदियहअतुलवडंतपुनगदभाए । इय जाओ डोहलओ अभयपयाणं पयच्छामि ।।६७३६।। जसदेवसिट्टिणा वि य सविसेसुप्पन्नपरमहरिसेण । गुणचंदं रायाणं विन्नविय करावियं सव्वं ।।६७३७।। तो तिस्सा पडिपुन्नेसु नवमासेसु सुहमुहुत्तंमि । परमसुहेण पसूया सलक्खणं उत्तमं पुत्तं ।।६७३८।। तो सिट्ठिणा सहरिसं कारावियमसमदिन्नधणनिवहं । नच्चंतलडहविलयं वद्धावणयं मणभिरामं ।।६७३९।।
Jain Education International
For Private & Personal Use Only
www.jainelibrary.org
