________________
सिरिभुयणसुंदरीकहा ॥
तो तुज्झ अत्थजायं जं पिउणा संचियं पुरा किं पि । पुन्नक्खएण तं तुह नीसेसं झिज्जिउं लग्गं ॥६५२१।। जं किं पि अत्थि सेसं तं जुयइपरव्वसेण सव्वं पि । तुमए पियाए कहियं परपुरिसवसत्तचित्ताए ॥६५२२।। तो तुह कालकमेणं खीणे दव्वंमि पविरलीहूए । कम्मारयाण वग्गे परिकलिए घरपरिप्फंदे ॥६५२३।। गुणराय-चंगुले च्चिय दोन्नि वि थक्काइं तत्थ गेहमि । अन्नं पुण नीसेसं पप्फुट्ट बोरघडओ व्व ॥६५२४।। तो जासि सयं छेत्ते एगागी लंगलं च वाहेसि । सा चंगुला वि भत्तं घेत्तूणं जाइ तुह छेत्ते ॥६५२५।। छेत्तंतरालमग्गे सुन्नं देवउलमत्थि अइगरुयं । कयसंकेयनरेहिं सह भुंजइ तत्थ सा भोए ॥६५२६।। अह अन्नदिणे धुत्ती भत्तं घेत्तूण सा गया पइणो । भुंजाविऊण दइयं समागया तत्थ देवउले ॥६५२७॥ तो कम्मधम्मजोगा कयसंकेओं न आगओ पुरिसो । अच्छइ पडिवालंती तस्सागमणं खणं जाव ॥६५२८॥ ता तत्थ पहपरिस्समपयंडरविकिरणतावसंतत्तो । तण्हा-छुहाकिलंतो पढमवयत्थो सुरूवो य ॥६५२९।। देसंतराओ एगो पहिओ तत्थेव सुन्नदेवउले । आजाणुधूलिधूसरचरणंतो आगओ तुरिओ ||६५३०।। सो तीए साणुरायं तिरिच्छवलियच्छिभल्लिनिभि(ब्भि)न्नो । हयहियओ तह विहिओ जह तीए संगओ वरओ ॥६५३१।।
Jain Education International
For Private & Personal use only
www.jainelibrary.org
