________________
५८६
सिरिभुयणसुंदरीकहा ॥ 'अंतोसंमीलियतारजायनीलुप्पलच्छिसंकोया । . वीरेंदुविओएण कयमुच्छा भिज्जए रयणी ॥६४२२।। वियसियकमलदलच्छी अन्नोन्नघडंतचक्कथणकलसा । वीरुच्छवंमि पत्ता दिणलच्छी संझनवरंगा ॥६४२३।। दठूण तुज्झ उदयं पुव्वावरक्खिणुत्तरदिसासु । तह मच्छरेण नरवर ! पेच्छ रवी रायमुव्वहइ' ।।६४२४।। इय एवं सोऊणं 'नमो जिणाणं' ति पभणिरो वीरो । उठुइ सयणीयाओ पुलिणाओ रायहंसो व्व ||६४२५।। कयपाहाउयकिच्चो जिणनाहं पूइऊण भत्तीए । अभिवंदिऊण य तहा निग्गच्छइ वासभवणाओ ॥६४२६।। पविसइ महंतमत्थाणमंडवं विविहरयणमणिखचियं । देवंगवत्थविरइयवियाणरमणीयवित्थारं ।।६४२७।। सियसुरहिकुसुममालाकयफुल्लहरंतरेसु रमणीयं । घणमुत्ताहलमणिरयणलंबिओऊलनिवहेहिं ।।६४२८।।
ओलंबियनाणाविहपसत्थफल-पुप्फ-रयणमालाहिं । कप्पडुमवासं पिव सुवेसबहुमिहुणसंकिन्नं ॥६४२९।। पेरंते सुपरिट्ठियबहुपहरणपाणिपत्तिसंघायं । उचियट्ठाणनिवेसियअसेससेवागयनरिंदं ||६४३०।। मणि-रयण-कणयनिम्मियचउरंसविचित्तवेइयाबंधं । तदुवरिनिविट्ठमणिमयसीहासणलद्धउस्सेहं ।।६४३१ ।। बहुरज्जमज्जणोचियउवगरणनिवेसरुद्धवित्थारं । बहुविहविलासिणीयणसंघट्टपडतहारलयं ।।६४३२।।
Jain Education International
For Private & Personal Use Only
www.jainelibrary.org
