________________
सिरिभुयणसुंदरीकहा ॥
तेणावि निउणमइणा सम्मं परिभाविऊण चित्तंमि ।
कहियं 'नरिंद ! सुज्झइ कल्ले च्चिय वीरसेणस्स || ६३८९ ॥ देव ! पयावइनामो पंचमसंवच्छरो अइपसत्थो । वेसाहो वि य मासो अक्खयतइया तिही देव ! ||६३९० ॥ मिगसिरसुहनक्खत्तं वारो सूरस्स सिद्धिजोगो य । वीरो वि वसहरासी जम्मत्थो ससहरो तस्स ||६३९१।। अन्ने विगहा सव्वे गोयरसुद्धीए तस्स फलदा य । नरनाह ! वसहलग्गस्स सूरमाई गहा सत्था ।। ६३९२ ।। छव्वग्गो वि नरेसर ! सुहफलदो तह पसत्थहोरा य । इय एरिसं सुलग्गं वरिससहस्सेहिं वि न होइ ||६३९३ ॥ एयंमि परमलग्गे विहियं कज्जं कयाइ न चलेइ । ता उज्जमह तुरंता निच्छियमेयं मए लग्गं' ।। ६३९४ ।। 'न चलेइ' त्ति पभणिए समाहयं मंगलं महातूरं । तो सव्वनरिंदेहिं बद्धाओ सउणगंठीओ ||६३९५ ।। घोसावियं च तुरियं चंपानयरीए कल्लदियहंमि । सिरिवीरसेणरज्जाहिसेयपरमुच्छवो होही || ६३९६।। सव्वेसिं रायाणं सामंताणं च मंडलीयाण । जाणावियं असेसं पहिट्ठहिययाण लोयाण ।। ६३९७ ।। एत्थंतरंमि सहसा दिणावसाणाहयाए भेरीए । सव्वेहिं सुओ सद्दो बाहिरियभुयणंतरालाए ||६३९८ || सलिलस्स व जाइ रवी संझासोवासिणीए परियरिओ । पच्छिम समुद्दमज्झं अहिसेउं वीरसेणं व ॥६३९९॥
Jain Education International
For Private & Personal Use Only
५८३
www.jainelibrary.org
