________________
५७२
सिरिभुयणसुंदरीकहा ॥ निसुणियदइयपरक्कमपहरिसरोमंचकंचुयच्छइया । गयणट्ठिया य वरिसइ वसुहारं बंदिलोयस्स ।।६२६८॥ मंसलवंसविमीसियसुगीयसवणद्धमीलियच्छिउडा । ते वि कुणइ अदरिदे पइनामायन्नणपहिट्ठा ॥६२६९॥ पत्तो कमेण राया रायपहं विविहजणवयाइन्नं । सलहिज्जंतो सहरिसनीसेसपुराणपुरिसेहिं ॥६२७०॥ . 'एयस्स नत्थि सरिसो असेसभुयणे वि रायरायस्स । जो वहइ ससुरसदं जयदुल्लहं वीरसेणस्स' ||६२७१।। अह नियइ सव्वलोओ उन्नामियकंधरो महादेविं । घुसिणारुणंगसोहं पहायसंझं व जयपुज्जं ॥६२७२।। उभयंसपासघोलिरकवोलसंकंतचारुसियचमरा । अंतोसंवेल्लियवयणचंदकिरिण व्व दियससिरी ॥६२७३।। घणसामलनीलमहिंदनीलथंभंतरंमि संकंता । जलभरियजलहरंतरपरिफु(प्फुरंती तडिलय व्व ॥६२७४।। सुसिणिद्धचरणकोमलतलंगुलीसोणकिरिणवित्थारा । नीसेसपुरिसपेसियमणुरायं ताडयंति व्व ॥६२७५।। जा वहइ चरणनहनिवहमुज्जलं नहमुहेण समसीसिं । कुणइ त्ति खंडखंडीकयं व धारेइ हरिणकं ॥६२७६।। गुफा(प्फा)वलंबिनेउरमणिकंचणवलयमंडलीकलिया । हढबंधसमाकिट्ठा पविसंती भुयणलच्छि व्व ।।६२७७।। अंतोकयवीरपइट्टहिययपासायधारणत्थं व ।। जा वहइ थंभजुयलं अप्पमाणोरुवित्थारं ॥६२७८।।
Jain Education International
For Private & Personal Use Only
www.jainelibrary.org
