________________
५६९
सिरिभुयणसुंदरीकहा ॥
तो राया पेच्छंतो गयणे धूयाए रिद्धिवित्थारं । वच्चइ सुहेण मग्गे आणंदुव्बूढरोमंचो ॥६२३५॥ कत्थ वि नियदेसपयाहिं विहियनाणापयारपडिवत्ती । वच्चइ समिद्धजणवयदंसणपरिवड्डिउच्छाहो ॥६२३६॥ कत्थ वि दुलंघअडवीसंकडपहत्थिरपयट्टकडओहो । पुच्छंतो पल्लिवई नाणादुमजाइनामाइं ॥६२३७॥ कत्थ वि सदेसएकग्गलग्गअरिरायविहियभयसेवो । जामाउयसंकाए वच्चइ परिओससंपत्तो ॥६२३८॥ इय अणवरयपयाणयविलंघियासेसपुहइवित्थारो । पत्तो कमेण चंपं विचित्तजसनरवई सबलो ॥६२३९॥ तो वज्जबाहुणा वि य पुरओ गंतूण वीरसेणो वि । वद्धाविओ सहरिसं ससुरसमागमणवत्ताए ॥६२४०।। एत्थंतरंमि सहसा पडिहारपवेसिओ महामंती । पन्नायरो पविट्ठो नरिंदसंपेसिओ तत्थ ॥६२४१।। तो दठूण सुमंतिं वीरो आणंदनिब्भरुक्कंठो । परिओसइ सप्पणयं समुच्चि(चि)यपडिवत्तिकरणेण ॥६२४२॥ दिन्नासणोवविठ्ठो पहिट्ठ-वीराहिवेण पुण पुट्ठो । 'कुसलं तुह पन्नायर ! ?, पत्तो कुसली महाराओ ?' ॥६२४३॥ तो भणइ महामंती "तुम्ह पसाएण देव ! मह कुसलं । तुज्झाणुहावओ च्चिय कुसलेण समागओ राया - ।।६२४४।। संपेसिओ म्हि वीराहिराय ! राएण तुम्ह पासंमि । कज्जेण तं पि सुव्वउ अणुट्ठियव्वं च तं तुमए ॥६२४५।।
Jain Education International
For Private & Personal Use Only
www.jainelibrary.org
