________________
५५१
सरिभुयणसुंदरीकहा ॥
“अणसणमूणोयरिया वित्तीसंखेवओ रसच्चाओ । कायकिलेसो संलीणया य बज्झो तवो होइ ॥६०३७॥ पायच्छित्तं विणओ वेयावच्चं तहेव सज्झाओ । झाणं उस(स्स)ग्गो वि य अभितरओ तवो होइ" ।।६०३८।। जावइयं चिय कालं नियमपरो होइ अणसणं ताव । ताई च नियमभेया हवंति बहुभेयभिन्नाई ॥६०३९।। मुट्ठी-गंट्ठिनिमित्तं नवकारो पहर-सड्ड-पुरिमटुं । राईभोयणचाओ उववासाइं भवे अ(5)णसणं ।।६०४०।। अन्नं च जावजीवं मरणंते अणसणं भवे राय ! । वज्जियचउआहारं पायववडणाइबहुभेयं ॥६०४१।। नियसत्तिसरिसमेयं जो जहरूवं करेइ सुद्धप्पा । सो तयणुरूवफलमवि पावइ न हु एत्थ संदेहो ॥६०४२।। वित्तस्स य नियमस्स य कलंतरं तह फलं च दोहिं पि । लब्भइ वियारियं चिय न होइ अवियारियं किं पि ॥६०४३।। जो नियमवज्जियनरो पसु व्व सो चरइ अचरमाणो वि । जं अचरंतो दीसइ अलाभओ अहव असमत्थो ।।६०४४।। भणिओ अणसणमइओ बज्झतवो संपयं पुण भणामि । ऊणोयरियं बीयं आयन्नसु एगचित्तेण ।।६०४५।। स च्चिय ऊणोयरिया ऊणाहारत्तणं खु जं राय ! । ऊणयरभोयणस्स हि संभवइ न इंदियक्खोहो ।।६०४६।। पंचिंदियखोभविवज्जियस्स न मणमि फुरइ मयणग्गी । निक्कामस्स य जइणो सव्वे सफला समारंभा ।।६०४७।।
Jain Education International
For Private & Personal Use Only
www.jainelibrary.org
