________________
सिरिभुयणसुंदरीकहा ॥
५४७ जस्स दया तस्स तवो जस्स दया तस्स सीलसंपत्ती । जस्स दया तस्स गुणा जस्स दया तस्स सिवसोक्खं ।।५९९३।। जो सयलजीवलोयं अत्थपयाणेण कुणइ अदरिदं । मारइ एगं जीवं सव्वं पि निरत्थयं तस्स ।।५९९४ ।। नीसेसधम्ममूलं असेससुहकारणं पवित्तं च । अभयप्पयाणदाणं सेसाइं उवप्पयाणाइं ।।५९९५।। धम्मोवग्गहदाणं भन्नइ नरनाह ! तं पि संखेवा । जे सव्वगुणसमिद्धा मुणिणो तं दिज्जए ताण ॥५९९६।। जेण अवटुंभेणं सेज्जासण-वत्थ-पत्तभत्तेण । सावटुंभसरीरा कुणंति मुणिणो परमधम्मं ।।५९९७।। तं पि उवग्गहदाणं चउप्पयारं नरिंद ! विन्नेयं । दायग-गाहगसुद्धं सुद्धं तह कालरूवेहिं ।।५९९८।। दायगसुद्धं भन्नइ जो दाया देइ नाणसंपन्नो । असढो य निरभिलासो सद्धारोमंचियसरीरो ।।५९९९।। गाहगसुद्धं भन्नइ जो किर तं गिण्हइ त्ति सो साहू । पंचमहव्वयजुत्तो छज्जीवनिकायकयरक्खो ।।६०००।। गुरुसुस्सूसानिरओ सुम्णो दंतिंदियो अलोभो य । खममाइधम्मनिरओ सुसाहुकिरियासमुज्जुत्तो ॥६००१।। पत्तविसुद्धिविहीणं जं दाणं होइ बहुप्पयारं पि । तं परलोए नरवर ! दिन्नं पि न बहुफलं होइ ।।६००२।। साहुस्स जहा देंतो लहइ पसंसं असेसभुयणे वि । चोरस्स पुणो देंतो पावइ दंडं नरिंदाओ ।।६००३।।
Jain Education International
For Private & Personal Use Only
www.jainelibrary.org
