________________
सिरिभुयणसुंदरीकहा ॥ रे वज्जबाहु ! तुह किं एत्तियमेत्तो वि भरवसो नत्थि ? | तासिं भत्तारेण विजो न जिओ कह णु पुण ताहिं ?' ||५८५१॥ तो राय ! मए भणियं 'वीर ! अहं तुह पउत्तिमलहंतो । मूढो व्व मणेण तओ गओ म्हि एआण पासंमि' ॥५८५२।। तो भणइ वीरसेणो 'सच्चमिणं नेहमोहियमणाण | पुरिसाण मच्छियाण व चेयन्नविवज्जओ होइ ।।५८५३।। ता वच्चामो समुहं खेयररायाण नियविमाणेण' । इय भणिऊणं कुमरो आरूढो वरविमाणंमि ॥५८५४।। तो देव ! मए सहिओ जोइसिएणं च जयवडायाए । सकिवाणेण (स)सत्थत्तेण तह य सियचमरहत्थाए ॥५८५५।। उप्पइओ गयणयलं भासुरकिरणोहपूरियदियंतो । भाणु व्व पबोहंतो विज्जाहरकमलसंडाइं ।।५८५६।। पणमिज्जंतो पुरओ ससंभमं अग्गिबाणसुहडेहिं । परमप्पओ व्व दिट्ठो असोय-सेहरयराएहिं ॥५८५७।। तो दंसणमेत्तेण वि परिचत्तविमाण-आसण-विलासा । सेवयकरसंवेल्लियवरिल्लवत्थंचला दो वि ॥५८५८।। गरुयाण(णु)रायनिब्भरनिहित्तदिट्ठी कुमारमुहकमले । आणंदवियसिउज्जलनीलुप्पलदीहरच्छिजुया ||५८५९।। गइवसचलंतकुंडलवच्छत्थलघोलमाणहारलया । वियसंतकवोलत्थलपिसुणियअभितरपमोया ।।५८६०।। असरिसपहरिसरोमंचकंचुइज्जंतपयडसव्वंगा । पणमंति वीरसेणं सगौरु(र)वुच्चरियजयसद्दा ॥५८६१।।
Jain Education International
For Private & Personal Use Only
www.jainelibrary.org
