________________
५२५
सिरिभुयणसुंदरीकहा ॥
तो वंतरीए(इ) भणियं 'कह न विरोहो तए समं मज्झ । जो मज्झ परमभत्तं मारसि जोईसरं पुरओ ।।५७५२।। मह सरणमुवगओ सो अहवा पुत्तो व्व मज्झ अणुगेज्झो । ता बंधुवहनिमित्तं तुमए सह बंधुवेर मे' ।।५७५३।। वीराहिवेण भणियं 'एसो तुह बंधवो अहं तु रिऊ ? । पायं न जाणसि च्चिय - सरूवमिह बंधु-वेरीण ॥५७५४।। उवयारवयारकया होति जए बंधु-वैरिया निययं । कहमेसो उवयारी ? अहं पि कह तुज्झ अवयारी ? ॥५७५५।। तुमए च्चिय उवयरियं इमस्स खग्गाइदाणभावेण । एयस्स न उण सत्ती जो तुह उवयरइ गरुययरं' ।।५७५६।। कच्चायणीए(इ) भणियं 'तूसामि न समहिओवयारेहिं । किंतु निक्कारिमाए तूसामि नरिंद ! भत्तीए' ||५७५७।। तो भणइ वीरनाहो ‘सच्चविया का तए मह अभत्ती ? । जेण अभत्तित्तणओ मए समं भिडिउमुज्जुत्ता ?' ॥५७५८।। कच्चायणीए(इ) भणियं 'सक्केमि न दाउमुत्तरं तुज्झ । जइ सच्चं मह भीओ ता मुक्को जाहि नियठाणं' ॥५७५९॥ तो भणियं वीरेणं न केवलं उत्तरंमि असमत्था । वस-मंस-मज्जभक्खिरि ! तक्केमि रणे वि असमत्था' ||५७६०॥ 'असमत्थ'त्ति सरोसं वयणं सोऊण वीरसेणस्स । सा भेरवी सुभीमं करेण परितोलइ तिसूलं ॥५७६१ ।। तो चिंतइ वीरवई 'एयाओ खुद्दरुद्ददेवीओ । मायाबहुलाओ(उ) न ता इमासु सरलेहिं होयव्वं ।।५७६२।।
Jain Education International
For Private & Personal Use Only
www.jainelibrary.org
