________________
५२१
सिरिभुयणसुंदरीकहा ॥
मा भणह जं न कहियं संतंमि मए न राय ! तुह रज्जं । जोइंद ! सविग्घ च्चिय होही नणु मंतसंसिद्धी' ।।५७०८।। इय भणिऊणं वीरो बिउणीकयवामनियभुयावंडो । खडहडियभुवणसिहरं करेइ भीमं करप्फोडं ।।५७०९।। अह दो वि ते सरोसा असहायं पाविऊण वीरवई(इं) । जुझंति जुज्झदक्खा नाणाविहबंधकरणेहिं ।।५७१०॥ तिन्नि वि गुरुसामत्था तिन्नि वि नियकज्जसाहणुज्जुत्ता । तिन्नि वि पहारदक्खा तिन्नि वि वंचंति परघाया ॥५७११॥ खणमेक्कपहारेणं अहिहूया दो वि वीरसेणेण । मुच्छंति अडवडंता पडंति धरणीए निच्चेट्ठा ।५७१२॥ पुण लद्धचेयणा ते हणंति जुगवं कुमारमइरोसा । वियसियमुहसयवत्तो पुणो वि ते दो वि पाडेइ ॥५७१३।। तो निठुरकुमरपहारजज्जरंगाण ताण दोण्हं पि । संदेहतुलारूढं जायं जीयं च विहवं च ।।५७१४।। एत्थंतरंमि जोई खणमेगं ठाइ झाणजोगंमि । सुमरियमेत्ता तेणं समागया तत्थ चामुंडा ॥५७१५।। निम्मंसककसतणू पयंडनरमुंडमंडियसिरग्गा । अइभुक्खा खीणंगी जयभक्खणकयबहुमुह व्व ।।५७१६।। सिकंतरपण्ह(ल्ह?)त्थियवामकरंतंगुलीकयनिवेसा । पयडियभेरविमुद्दा छुहाए असइ व्व अप्पाणं ।।५७१७।। दूरं पसरियमुहकुहरकुडिलदाढाहिं भीसणा काली । सहचंदकलाकवलियबहुबहुलनिस व्व पलयनिसा ॥५७१८।।
Jain Education International
For Private & Personal Use Only
www.jainelibrary.org
