________________
सिरिभुयणसुंदरीकहा ॥ एयाए वि दासीए(इ) अच्चत्थं वीरसेणरत्ताए । मारिज्जंतीए मए सो काही इह परित्ताणं' ॥५६३१।। एवं भणिऊण तओ नरसीहो रोसतंबिरनिडालो । धरइ परियारसहियं वामकरग्गंमि करवालं ॥५६३२।। दिढमुट्ठिनिविटेणं दाहिणहत्थेण कड्डइ सरोसं । दिठे(टे)ण जेण सव्वो भयरतरलच्छो जणो जाओ ।।५६३३।। पुण पुच्छिएण भणियं जोइसिएणं 'नरिंद ! मह मरणं । एयाइ वि वेसाए दोवाससए वि न उ अज्ज |५६३४।। वयपरिणामे अहयं दिक्खं घेत्तूण कयतवच्चरणो । कयअणसणाइकिरिओ सुद्धमणोऽहं मरिस्सामि ।।५६३५।। एसा वि जयवडाया जहासुहं वीरसेणदिन्नाई । भोत्तूण बहुसुहाई पज्जंते विहियजिणधम्मा ।।५६३६।। झायंती नवकारं अणसणविहिणा य वासुपुज्जस्स । पुरओ मरिऊण तओ सोहम्मे सुरवरी होही' ॥५६३७।। इय एवं जोइसियं जंपंतं तं च जयवडायं पि । राया अहिद्दवंतो इय एवं भणिउमाढत्तो ॥५६३८॥ दोन्नि वि समकालं चिय कयावराहाई वेरिपक्खाई । मारिस्सं न खमिस्सं जो रक्खइ जाह तं सरणं ॥५६३९।। तो जंपइ जोइसिओ जयवडाया य वीरसेणो अम्ह(ऽम्ह) । सरणं भुयणसरन्नो पज्जंते वासुपुज्जो य' ।।५६४०॥ तो कुमरनामकित्तणसमहियसंजायरोसफुरिओहो । उग्गिरइ खग्गरयणं नरसीहो हणणबुद्धीए ॥५६४१।।
Jain Education International
For Private & Personal Use Only
www.jainelibrary.org
