________________
सिरिभुयणसुंदरीकहा ॥ धम्मविणिओयरहियं केइ पुणो अज्जिऊण बहु अत्थं । अह जंति अप्पण च्चिय अत्थो वा अन्नओ जाइ ॥४२२॥ इय एवमाइ सव्वं परमत्थविवेयवज्जिया पुरिसा । सयणित्थि-धणाईयं तमेव मन्नंति परमत्थं ॥४२३।। खेल्लंति जहा डिंभा पुत्तलय-घरुल्लयाइमोहेण । तह मुझंति विमूढा अतत्त-तत्ताणुबंधेण ॥४२४।। इय नाणाविहवामोहमोहिया वंचिऊण अप्पाणं । इहलोयसुहासत्ता हारंति मुहा मणुयजम्मं ॥४२५॥ अप्पाणं भो ! चिंतह लोयस्स कए किमेत्थ मुझेह ? । पज्जलियघरवसेणं नियदेहं मा उवक्खेह ।।४२६॥ तं किंपि सुवुरिसेणं कायव्वं जेण अकयविक्खेवं । भज्जइ गमागमो जोणिलक्खविसमम्मि संसारे ॥४२७।। जह दीहपहपरिस्सम-खीणो उव्विज्जए परिब्भमिउं । इच्छइ बहुसुहअविचल-ठाणम्मि अवट्टिई कोइ ॥४२८॥ तह दीहमहाभवमग्ग-भव(म)णक्खिन्नेण एत्थ बुद्धिमया । सासयसुहम्मि मोक्खे कायव्वो सव्वहा वासो" ||४२९॥ इय जाव सजलजलहर-गहीरसरसरिसमहुरनिग्घोसो । सिरिरयणायरसूरी धम्मकहं कहइ परिसाए ॥४३०॥ ताव सविसेसपसरिय-हरिसवसुब्बूढबहलरोमंचा । जाया घणसमयंकुरकलियव्व मही महापरिसा ॥४३१॥ एत्थंतरम्मि राया आणंदवसुल्लसंतरोमंचो । .. सिरि कलियकरयलंजलि-बंधो विनविउमाढत्तो ॥४३२।।
Jain Education International
For Private & Personal Use Only
www.jainelibrary.org
