________________
___ ४६०
सिरिभुयणसुंदरीकहा ॥ तो राया उवविठ्ठो अत्थाणे मिलियमंति-सामंते । इयरो वि अग्गिमित्तो मयणसिरीसन्निहिं पत्तो ।।५०३८।। परिणीयमिव कलत्तं हत्थे घेत्तूण जाइ वासहरं । रायसेज्जाए गंतुं अभिरमइ जहासुहं देविं ॥५०३९।। एत्थंतरंमि दटुं तहाविहं कंचुई निवविरुद्धं । गंतूण तक्खण च्चिय साहइ रायाहिरायस्स ॥५०४०।। मोत्तूण तं तह च्चिय अत्थाणं नरवई परमकुद्धो । संपत्तो वासहरं पेच्छइ सव्वं गवक्खेण ।।५०४१॥ तो मुणिदूसणकम्मं तक्खणमेत्तेण समुइयं तस्स । इहलोए वि मुणीणं फलइ दुगुंछा . न संदेहो ।।५०४२।। तो दिढपायपहारपहयकवाडेण राइणा तुरियं । विसिऊण अग्गिमित्तो भणिओ सोल्लुट्ठवयणेहिं ।।५०४३।। 'रे अग्गिमित्त ! सुद्दा महामुणी जइ अदंसणीया ते । ता किं परनारिरया दियाइणो होति दट्ठव्वा ? ।।५०४४।। जइ ताण नो पसंसा कायव्वा परमबंभचारीण । तुम्हारिसाण ता किं एयसरूवाण कायव्वा ?' ।।५०४५।। इय एवमाइ बहुयं निब्भच्छिय कक्कसेहिं वयणेहिं । केसेसु तओ घेत्तुं नीओ अत्थाणमझंमि ।।५०४६।। तो नरवइणा सव्वं आमूलं सव्वलोयपच्चक्खं । कहियं तस्स सरूवं पुण भणिओ विण्हुमित्तो वि ॥५०४७।। 'जाणतो दुच्चरियं कणिट्ठनियभाउणो जणविरुद्धं । जं न निवारसि पायं तं मन्ने सम्मयं तुज्झ' ।।५०४८।।
Jain Education International,
For Private & Personal Use Only
www.jainelibrary.org
