________________
४३९
सिरिभुयणसुंदरीकहा ॥
सेज्जाहरं पविट्ठो पट्ठवइ पसायपादुयाईए । सेज्जाए सुहनिसन्नो भणिओ रइकेलिणा एवं ।।४८०७।। ‘एसो देव ! पओसो ओसारंतो जणस्स संचारं । अणुरत्तसेवओ इव उवट्ठिओ तुज्झ समर.न्नू ।।४८०८।। एसा वि देव ! रयणी जणणि व्व कुचंहियाइं झंपंती । अंधारपडं व तमं वित्थारइ मोहियजणोहं ।।४८०९।। पहरस्सुवरि(रि) नरेसर ! चउनाडीसमयताडिया भेरी । मणवंछियत्थसिद्धिं निविग्धं तुज्झ साहेइ' ।।४८१०॥ इय रइकेलिसमुत्थ(त्थि)यवयणेहिं तुरंतमाणसो राया । दिढवीरगंठिनिवसणनियंबसुनिबद्धअसिधेणू ॥४८११।। सुनिबद्धकेसपासो करालकरवालकलियकरकमलो । हारकयबंभसुत्तो विणिग्गओ वासभवणाओ ।।४८१२।। अविगणियसेज्जवालो दूरं परिहरियदारपडिहारो । भुल्लवियजामइलो नीहरिओ रायभवणाओ ।।४८१३॥ मह भारिया वि धुत्ती भणइ ममं नाह ! अज्ज तइयाए । दठूण अहं गोरिं भुंजिस्सं ता विसज्जेहि ॥४८१४॥ तो सरलसहावेणं विसज्जिया सा मए सह सहीहिं । पूओवगरणसहिया पडिवालइ दारदेसंति ॥४८१५।। तो तत्थ दारदेसे संपत्तो नरवई सरइकेली । . घेत्तूणं कंतिमई नीहरिओ हट्टमग्गेणं ।।४८१६।। अह तुरियपओ राया तीए समं जाइ बाहिरुज्जाणे । रइकेलिणा पयप्पिय-कुसुमत्थरणंमि उवविसइ ।।४८१७।।
Jain Education International
For Private & Personal Use Only
www.jainelibrary.org
