________________
सिरिभुयणसुंदरीकहा ॥
तो गुरुणा नाऊणं तहाविहिं(ह) ताण आसयविसुद्धिं । 'मा होउ विलंबेणं एएसिं पत्थुयविघाओ' ||४७६३।। एमाइ चिंतिऊणं भणइ गुरू ‘मा करेह पडिबंधं । उज्जमह सकज्जत्थं एस अहं तुम्ह अणुकूलो' ।।४७६४।। तो तव्वेलं जणणी नियदेहविभूसणोवगरणेण । जिणभवणेसु करावइ विसिट्ठपूयाइसक्कारं ॥४७६५।। तो ताई सुहमुहुत्ते पसत्थविहि-करण-वार-लग्गंमि । पव्वावियाइं गुरुणा विसुज्झमाणेण चित्तेण ||४७६६।। विमलमई अज्जियाए समप्पिया सीलदेविनामाए । इयरे वि मुणिकुमारा चिठ्ठति गुरूण पासंमि ॥४७६७।। अब्भसियसाहुकिरिया अहिगयनीसेससुत्तसारत्था । विविहतवसुसियदेहा अट्ठमयट्ठाणपरिहीणा ।४७६८।। ते थोयदिणेहिं चिय संजाया उत्तरोत्तरगुणड्डा । परलोयसुत्थियमणा विहरंति गुरूहिं(हि) सह वसुहं ।।४७६९।। तो ताण अहं सावय ! गुरुसन्निहिगमणमाई(इ)वुत्तंतं । पव्वज्जापज्जंतं जाणंतो लोयवयणेहिं ॥४७७०।। सिढिलियनेहाबंधो उवेक्खमाणो मणेण चिट्ठामि । पव्वइयाई ति तओ सोऊणं सुत्थिओ जाओ ।।४७७१।। तो हं नियसयणेहिं अन्नं परिणाविओ कुलपसूयं । वररूय-जोव्वणड्ढे कंतिमई नाम दियकन्नं ।।४७७२।। सह तीए परमहिठ्ठो पीणथणकलसकंठकयबाहू । . रइसायरे निबुड्डो गयं पि कालं न याणामि ॥४७७३।।
Jain Education International
For Private & Personal Use Only
www.jainelibrary.org
