________________
४३१
सिरिभुयणसुंदरीकहा ॥ चिंतामणि व्व लद्धं पयडनिहाणं व कप्परुक्खं व । कह परिहरामि तुह तुच्छगेहकज्जेण जिणधम्मं ? ।।४७१९।। एसो न तुज्झ रोसो किं तु पसाओ व्व मह असामन्नो । जं कारायारनिबंधणाओ गेहाओ नीणेसि ।।४७२०।। जो बहुमणोरहेहिं परिहरिउं वंछिओ गिहारंभो । सो पुनपरिणईए अकिलेसेणेव परिचत्तो' ।।४७२१।। इय भणिउं विमलमई ममं च आपुच्छिऊण नीहरिया । बहुरोसेण मए वि य ‘जाहि' त्ति सनिठुरं भणिया ।।४७२२।। गंतूण साहुणीणं सयासमाचि(च)क्खियं नियसरूवं । 'मह देह अज्जियाओ ! पव्वज्जं पावनिम्महणं' ।।४७२३।। तो साहुणीहिं(हि) भणियं ‘भद्दे ! मा होसु किं पि उच्छुक्का । अज्ज वि नो जाणिज्जइ तुह पइणो केरिसं चित्तं ? ।।४७२४।। धम्मनिमित्तो एसो पारंभो तुज्झ साविए ! सो वि । सव्वसमाहाणेणं जह होइ तहा करेयव्वो' ।।४७२५।। तो ते वि मज्झ पुत्ता नियजणणीमग्गमणुसरंता य । मं चइऊण विसं पिव विमलवई(मइ)समीवमणुपत्ता ।।४७२६।। गंतूण तेहिं भणिया जणणी ‘मा अंब ! कुणसु मणखेयं । अणुकूला गलथल्ला अम्हं पुन्नेहिं(हि) संजाया ।।४७२७।। एण्हि जा तुज्झ गई अम्हं विय सा न एत्थ संदेहो । .." उठेहि किं विचिंतसि ? वच्चामो गुरुसमीवंमि ॥४७२८।। अंब ! विलंबो कीरइ पावट्ठाणे न धम्मकज्जंमि । निस्सेयसंकज्जाइं होंति सविग्घाई इह जेण ।।४७२९।।
Jain Education International
For Private & Personal Use Only
www.jainelibrary.org
