________________
सिरिभुयणसुंदरीकहा ॥
खणमेत्तमहामइविबुहतत्तसंदेहकहियसिद्धंतो । खणलोयदाणविणिउत्तपुरिसकयतुरियआवासो ॥३६८।। खणदेसविसयकंटय-विसोहणो सावहाणमणकिरिओ । खणपरविसयनिवेसिय-नरवइसंपेसियपसाओ ।।३६९।। इय पिउवयणअणुट्ठिय-वावारपरंपराविणोएण । सव्वत्थ सावहाणो जा अच्छइ तत्थ अत्थाणे ||३७०।। ता नरवइणा भणियं किमेस नयरीए दीसए लोओ । सविसेसुज्जलभूसण-नेवत्थो बाहिरे जंतो ? ॥३७१।। अह साहइ वरमंती महोयही परमसम्मदिट्ठी जो । इह देव ! जणो वच्चइ वंदणवडियाए सूरिस्स ।।३७२।। जिन्नुज्जाणे बाहिं नरवर ! बहुसमणसंघपरियरिओ । रयणायरोत्ति नाम समागओ एत्थ आयरिओ ॥३७३।। अइदुक्करतव-चरणेहिं सुसियदेहो वि ललियलायन्नो । कन्नन्तखलियलोयण-जुयलो वि अदिइहलोओ ॥३७४।। पढमवयत्थो वि सया जो पंचमहव्वयाइं उव्वहइ । अहिगयसामन्नो वि हु नीसामन्नत्तणं पत्तो ।।३७५।। हद्धी हवं मह जेण जुवइवम्गो असमंजसे दुविओ । इय वेरग्गाइसया मयणोव्व जइत्तमावन्नो ॥३७६।। बहुभवपरंपरासंगयाण जीवाण को परो एत्थ । इय परदुक्खेहिं सया दुहिओ भुयणस्स बंधुव्व ॥३७७।। रविकोडिअसझं पि हु परहिययगयं जणाण बहुभेयं । जो मोहमहातिमिरं अउव्वभाणुव्व अवणेइ ॥३७८।।
Jain Education International
For Private & Personal Use Only
www.jainelibrary.org
